Image

മനസ്സൊരു മാരിവില്ല് (ജയശ്രീ രാജേഷ്)

Published on 29 March, 2021
മനസ്സൊരു മാരിവില്ല് (ജയശ്രീ രാജേഷ്)
നിറങ്ങൾ വാരി
പുതച്ചൊരെൻ
മനസ്സിൽ തൂവുന്നു
ഹൃദയത്തിൽ ചാലിച്ച
നിറപുഞ്ചിരി

അഴകോലും വിസ്മയ
വർണ്ണങ്ങൾ മേളിച്ചു
തീർത്തൊരാ
മാരിവില്ലുണ്ടെന്നില്ലെന്നും

നീൾമിഴിപീലി -
കൾക്കുള്ളിലൊരാകാശം
നീലയായ് വാനിൽ
പരന്നു നിൽപ്പു

നെഞ്ചിന്റെ ഉള്ളിലായ്
അറിയാതെ കൊഞ്ചിച്ച
നഷ്ടപ്രണയത്തിൽ
ഹരിതഭംഗി

വിങ്ങുന്ന ഓർമ്മയിൽ
ചിമ്മുന്ന മിഴിപോലെ
തെളിയുന്നു അണയുന്നു
കാവി പടർന്നൊരു
ഇഷ്ടങ്ങളൊക്കെയും

തുടിപ്പെഴും കണിയായി
ഓരോ പ്രഭാതവും
സുസ്മേരയാക്കാൻ
മഞ്ഞയിൽ ചാലിച്ച
ഉണർത്തുപാട്ട്

നിതാന്തമാം നിശ്വാസ
വീചികൾ പാടിയ
കൈവിട്ട ബാല്യത്തിൻ
റോസാപ്പൂ വർണ്ണങ്ങൾ

ശാന്തിതൻ ശംഖൊലി
വാനിൽ മുഴക്കുന്ന
 വെള്ളരിപ്രാവിൻ
വെളുത്ത കുപ്പായവും

രാജകീയ പ്രൗഢിയിൽ
രജനിയിൽ തിളങ്ങുന്ന
കൺമഷി തോൽക്കുന്ന
ഇരുളിൻ കറുപ്പും

വർണ്ണങ്ങൾ ഇഴചിന്തി
വീഴും പ്രഭാതത്തിൽ
മുഖം മറച്ചാടുന്നു
നിറങ്ങൾ തൻ ആഘോഷം....

         
Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക