ശ്രീ സുധീർ പണിക്കവീട്ടിലിന്റെ ആഴ്ചതോറുമുള്ള ചോദ്യോത്തര പംക്തി വളരെയധികം താല്പര്യത്തോടെയാണ് വായിച്ചത്. അവസാനത്തെ ചോദ്യത്തിനുള്ള ഉത്തരം നൽകിയ ബഷീറിനെ അഭിനന്ദിക്കുന്നു.

ഊമന്മാരോട് ആംഗ്യങ്ങൾ കാണിക്കുന്ന ചില ചേഷ്ടകളുമുണ്ട്. ഞാൻ പ്രൈമറി സ്‌കൂളിൽ പഠിക്കുന്ന കാലത്ത് നല്ല ശരീര പുഷ്ടിയുള്ള എന്നെക്കാളും പ്രായമുണ്ടായിരുന്ന ഊമനായ ഒരു ചെറുക്കനെ ഓർമ്മിക്കുന്നുണ്ട്. അന്ന് ഊമനെന്ന വാക്കിനു പകരം എല്ലാവരും അയാളെ പൊട്ടനെന്നായിരുന്നു വിളിച്ചിരുന്നത്.

വർത്തമാനം പറയുന്നതിനു പകരം അയാൾ കൈകൾകൊണ്ട് ആംഗ്യങ്ങളും ചില ശബ്ദങ്ങളും പുറപ്പെടുവിച്ചിരുന്നു. ഒന്നും മനസിലാവില്ലായിരുന്നു.

ഒരിക്കൽ ഒരു സുഹൃത്ത് എന്നോട് അയാളെ "മൂക്ക് ചൊറിഞ്ഞു കാണിക്കാൻ" പറഞ്ഞു. എന്റെ നിഷ്കളങ്കതയുടെ പുറത്ത് വഴിയിൽ കണ്ടപ്പോൾ അയാളുടെ മുമ്പിൽ ചെന്ന് സുഹൃത്തു  പറഞ്ഞപോലെ മൂക്ക് ചൊറിഞ്ഞു കാണിക്കുകയും ചെയ്തു. പകരം മുഖം കൂട്ടി അയാൾ എന്നെ അടിക്കുകയായിരുന്നു. 

ഊമൻമാരെ മൂക്കു ചൊറിഞ്ഞു കാണിച്ചാൽ തന്തക്ക് വിളിക്കുന്ന അടയാളമെന്ന് പിന്നീടാണ് എനിക്ക് മനസിലായത്.

വർഷങ്ങൾക്കു ശേഷം ഞാൻ കോളേജിൽ പഠിക്കുന്ന കാലത്ത് അയാളെ ഒത്ത ആകാര ഭംഗിയുള്ള ഒരു തൊഴിലാളിയായിട്ടായിരുന്നു കണ്ടത്. ഓടി വന്ന് സ്നേഹപ്രകടനങ്ങളിൽക്കൂടി എന്തൊക്കെയോ ആംഗ്യം കാണിച്ചു. അടുത്തുള്ള ചായക്കടയിൽ നിന്നും പരിപ്പുവടയും വാങ്ങി തന്നു. അന്നുണ്ടാക്കിയ വഴക്കിന് എന്നോട് ക്ഷമ പറഞ്ഞതാണെന്ന് ചായക്കടക്കാരൻ പറഞ്ഞപ്പോഴാണ്' ആയാൾ കാണിച്ച ആംഗ്യ ഭാഷയുടെ അർത്ഥം മനസിലായത്.