ഇന്നലെ രാവിലെ , ഓര്മ്മ വെച്ച അന്ന് മുതല് സ്ഥിരം അലര്ജിക്കാരിയായ ഞാന് ഇടി വെട്ടുന്ന പോലെ നിര്ത്താതെ തുമ്മി കൊണ്ടിരുന്നു .
ഭാഗ്യവശാല് ഈ വീട്ടിലെ ഒരേ ഒരു അലര്ജിക്കാരി ഞാന് മാത്രം ആയത് കൊണ്ട് ബാക്കി മൂന്ന് പേരുടെയും ശബ്ദം ചേര്ത്ത് വെക്കുന്നതിനേക്കാള് ഉച്ചത്തിലാണ് എന്റെ ഈ നോണ് സ്റ്റോപ്പ് തുമ്മല്.
ഈ തുമ്മല് തുടങ്ങാന് അങ്ങനെ പ്രത്യേകിച്ച് കാരണം ഒന്നും വേണ്ട.
പൂമ്പൊടി , കൂടുതല് തണുപ്പോ , കൂടുതല് ചൂടോ (!) മുതല് അടുത്ത വീട്ടിലെ പട്ടിയോ പൂച്ചയോ , ഫെന്സ് പൊളിച്ചു ഇവിടെ വന്നാല് മതി , എനിക്ക് തുമ്മാന് ...
അതും , ഒരു മരുന്നിലും നില്ക്കാതെ, സ്റ്റിറോയിഡ് കുത്തിവെപ്പ് വരെ സ്ഥിരം എടുക്കേണ്ടി വന്നിട്ടും ഉണ്ട് .
പിന്നെ പാരമ്പര്യമായി കിട്ടിയതും , ഓര്മ്മ വെച്ച നാള് മുതല് ഉള്ളതും ആയത് കൊണ്ട് അച്ഛനും അമ്മയ്ക്കും (അവര്ക്ക് മാത്രം) അതിന്റെ 'തീവ്രതയും ഭീകരതയും ' അറിയാം ..
കഴിഞ്ഞ പതിനഞ്ചു വര്ഷം കൊണ്ട് ഭര്ത്താവും പഠിച്ചു .
പക്ഷേ പിള്ളേര് , അത്രയ്ക്ക് അങ്ങ് മനസ്സിലാക്കിയിട്ടില്ല ..
ഒന്നാമത് ഇവിടത്തുകാരുടെ ശീ .....എന്നുള്ള ചെറിയ തുമ്മലും , കൂടെയുള്ള 'സോറി ' പറച്ചിലും , കണ്ടും , ചെയ്തും വന്ന രണ്ടെണ്ണവും , എന്റെ 'വെള്ളിടി തുമ്മല് ' തുടങ്ങുമ്പോള് ആദ്യമൊക്കെ പേടിച്ചു കരയുമായിരുന്നു .
ഇപ്പോള് , മൂത്തവള് ഒരു സുരക്ഷിത സ്ഥാനത്തു നില്ക്കും അടുത്തോട്ട് വരില്ല .
ഇളയവള് ആണെങ്കില് , അവള് കാരണമാണ് അമ്മയുടെ 'വെള്ളിടി തുമ്മല് ' എന്ന ധാരണയില് , എന്റെ ഓരോ വെള്ളിടിക്കും ' മമ്മാ , ഐ ആം സോറി ' എന്ന് പറഞ്ഞു കൊണ്ടിരിക്കും .
അവള്ക്കറിയാമോ ഇത് വെള്ളക്കാരുടെ 'ബ്ലെസ്സ് യൂ' തുമ്മല് അല്ല , നല്ല ഒന്നാന്തരം നാടന് അലര്ജി തുമ്മല് ആണെന്ന് ...
ഞാന് തുമ്മി തുടങ്ങുമ്പോള് , ചെറിയ കൊച്ചു , രണ്ട് കൈയും കൊണ്ട് , രണ്ടു ചെവിയും പൊത്തിപ്പിടിച്ചു നിര്ത്താതെ 'സോറി ' പറയുന്നത് , അയല്ക്കാര് എങ്ങാനും കണ്ടിരുന്നെങ്കില് അത് ഒരു തരം ഇന്ത്യന് ശിക്ഷാ രീതി ആണെന്ന്
കരുതിയേനെ ...
അങ്ങനത്തെ ദിവസങ്ങളില് അവര് സാധാരണ , 144 പ്രഖ്യാപിച്ചത് പോലെയാണ് വീട്ടില് , പെരുമാറുന്നത് ....
രാവിലെ തന്നെ എന്റെ കഷ്ടപ്പാട് കണ്ട് പോയ ഭര്ത്താവ് , വല്ലതും നാടന് തിന്നാന് വാങ്ങാമെന്ന് വെച്ചാണ് ഇവിടത്തെ പാകിസ്ഥാന് കടയില് കയറിയത് .
അരിയും , മീനും ഒക്കെ വാങ്ങിയപ്പോള്, കൂടെ 'ഡെയിലി ഡിലൈറ്റ്' ന്റെ ഫ്രോസണ് ഏത്തയ്ക്കാ അപ്പവും വാങ്ങി .
വീട്ടില് വന്നു അതെടുത്തു മൈക്രോവേവ് ചെയ്ത് പിള്ളേര്ക്ക് കൊടുത്തപ്പോള് , സ്വാഭാവികമായും അവര് തുപ്പി എറിഞ്ഞിരിക്കണം . ****അതിപ്പോള് ഉഴുന്ന് വട , പരിപ്പ് വട ഒക്കെ ആ വിധി അനുഭവിച്ചവര് ആണ് .****
ഈ സംഭവം , ഞാന് അറിഞ്ഞില്ല . പിള്ളേരെ ബുദ്ധിമുട്ടിക്കണ്ട എന്ന് വെച്ച് മുകളില് കിടക്കുകയാണ് . മൂക്ക് പിഴിഞ്ഞു , നാലാമത്തെ ടവല് (സാമാന്യം വലുത് ) ആയി.
അപ്പോള് ആണ് മൂത്തവള് , പ്ലേറ്റും കൊണ്ട് വരുന്നത് .....
എന്തോ പകരം വീട്ടുന്ന ഒരു പുച്ഛച്ചിരി കൂടെ ഉണ്ട് . (ഇളയവള് ആണെങ്കില് 'തുമ്മല് സീസണില് 'എന്റെ ഏഴയലത്തു വരില്ല )
മൂത്തവള് പ്ലേറ്റ് വെച്ച് നീട്ടിയിട്ട് ഒരു മാസ് ഡയലോഗ് :
"Mamma , look Daddy bought something YUCKY for you. Enjoy yourself (!)"
'അച്ഛന് അമ്മയ്ക്ക് വേണ്ടി ഒരു വൃത്തികെട്ട സാധനം തന്നു വിട്ടിട്ടുണ്ട് . അനുഭവിച്ചോ ' എന്ന് ......
അന്തം വിട്ട് പ്ലേറ്റില് നോക്കിയ ഞാന് കണ്ടത് ഒരു ഏത്തയ്ക്കാ അപ്പം .
ഡീ ...എന്ന് അലറുന്നതിന് മുമ്പ് , ലവള് സ്ഥലം കാലി ആക്കിയിരുന്നു .
(തുമ്മലിന്റെ ശിക്ഷ ആയിട്ടാണ് , ഡാഡി അത്രയ്ക്ക് വൃത്തികെട്ട സാധനം മമ്മിക്ക് കൊടുത്തു വിട്ടതെന്ന് ധരിച്ച ഏഴ് വയസ്സ്കാരി!) ഇതൊക്കെ വളര്ന്ന് വരും തോറും നാട്ടില് പോകാനുള്ള പേടി കൂടുന്നതല്ലാതെ , ഒട്ടും കുറവില്ല ...
ഈ വര്ഷം 'അമ്മ തനിയെ നാട്ടില് പോയാല് മതി , എന്നെ പ്രതീക്ഷിക്കണ്ട, അപ്പൂപ്പനെയും അമ്മൂമ്മയേയും വീഡിയോ ചാറ്റില് എന്നും കണ്ട് തൃപ്തി അടഞ്ഞോളാം എന്ന് നേരത്തെ പറഞ്ഞിട്ടുണ്ട് .
കാരണം വേറെ ഒന്നും അല്ല കൊതുക് , ചുവപ്പ് /കറുപ്പ് ഉറുമ്പ് , പാറ്റ , ചിലന്തി , പല്ലി .
ഇവയൊന്നും നാട്ടില് pets അല്ലല്ലോ !
പാഠം
അവര് പറഞ്ഞിട്ടല്ലല്ലോ, അവര് ഇവിടെ വളര്ന്നു പോയത് ... എന്നെ പറഞ്ഞാല് മതി ...