മുന് മുഖ്യമന്ത്രി ഉമ്മന്ചാണ്ടിക്കെതിരായ ബലാത്സംഗക്കേസില് അന്വേഷണം വേഗം പൂര്ത്തിയാക്കണമെന്ന് ആവശ്യപ്പെട്ട് പരാതിക്കാരി നല്കിയ ഹര്ജി ഹൈക്കോടതി തള്ളി.
പൊലീസ് അന്വേഷണം എപ്പോള് പൂര്ത്തിയാക്കണമെന്ന് പറയാന് ഹര്ജിക്കാരിക്ക് അവകാശമില്ലെന്ന് വ്യക്തമാക്കിയാണ് ഹര്ജി തള്ളിയത്. ചീഫ് ജസ്റ്റിസ് അധ്യക്ഷനായ ബഞ്ചാണ് അപ്പീല് ഹര്ജി തള്ളിയത്. നേരെത്തെ സിംഗിള് ബഞ്ചും ഈ ഹര്ജി തള്ളിയിരുന്നു
പീഡനം നടന്നതിനു ശേഷം ഏഴ് വര്ഷം കഴിഞ്ഞല്ലേ പരാതി നല്കിയതെന്നും ഹര്ജിക്കാരിയോട് കോടതി ചോദിച്ചു. നിലവിലുള്ള പൊലീസ് അന്വേഷണത്തില് കാലതാമസം ഉള്ളതായി കാണുന്നില്ലെന്ന് ഹൈക്കോടതി പറഞ്ഞു.
ബലാത്സംഗം അടക്കമുള്ള പല കേസുകളിലും പരാതി നല്കാന് വൈകുന്നത് പരാതിക്കാരുടെ ഉദ്ദേശശുദ്ധിയെ ചോദ്യം ചെയ്യാന് കാരണമാകുമെന്നും കോടതി നിരീക്ഷിച്ചു. ഇപ്പോഴത്തെ പരാതിക്കാരിയുടെ ഹര്ജി അനവസരത്തിലുള്ളതാണെന്നും ഹൈക്കോടതി വ്യക്തമാക്കി.