Image

യുക്മ കേരളാപൂരം വള്ളംകളി : ടീം രജിസ്‌ട്രേഷന്‍ ഏറ്റുവാങ്ങി സി.പി. ജോണ്‍

Published on 12 August, 2019
യുക്മ കേരളാപൂരം വള്ളംകളി : ടീം രജിസ്‌ട്രേഷന്‍ ഏറ്റുവാങ്ങി സി.പി. ജോണ്‍

ലണ്ടന്‍: സൗത്ത് യോര്‍ക്ക് ഷെയറിലെ മാന്‍വേഴ്‌സ് തടാകത്തില്‍ ഓഗസ്റ്റ് 31ന് നടക്കുന്ന യുക്മ വള്ളംകളിയുടെ ടീം രജിസ്‌ട്രേഷന്‍ ഓക്‌സ്‌ഫോര്‍ഡില്‍ നടന്ന ചടങ്ങില്‍ കേരളാ പ്ലാനിംഗ് ബോര്‍ഡ് മുന്‍ അംഗവും സിഎംപി ജനറല്‍ സെക്രട്ടറിയുമായ സി.പി. ജോണ്‍ ഏറ്റുവാങ്ങി.

മലയാളികളുടെ കുടിയേറ്റ സംസ്‌കാരവും സംഘാടകസംരംഭക മേഖലകളില്‍ കൈവരിക്കുന്ന നേട്ടവുമെല്ലാം വിവിധ കാലഘട്ടങ്ങളിലെ ഉദാഹരണ സഹിതം അദ്ദേഹം വിവരിച്ചു. വിദേശരാജ്യങ്ങളിലേയ്ക്ക് പ്രത്യേകിച്ച് ബ്രിട്ടനിലേയ്ക്ക് കുടിയേറിയിരിക്കുന്ന മലയാളികള്‍ക്ക് കേരള സംസ്ഥാനത്തിന്റെ വികസന പ്രക്രിയയില്‍ നിര്‍ണായക പങ്ക് വഹിക്കാനാവുമെന്ന് അദ്ദേഹം പറഞ്ഞു. സാമ്പത്തിക നിക്ഷേപങ്ങളേക്കാള്‍ കൂടുതലായി വിവിധ മേഖലകളിലായി ബ്രിട്ടനില്‍ നിന്നും ആര്‍ജ്ജിച്ചെടുത്ത വിജ്ഞാനം നമ്മുടെ നാടിന് എങ്ങനെ പ്രയോജനപ്പെടുത്താം എന്ന വിഷയത്തിലാണ് കൂടുതലായ പഠനം നടക്കേണ്ടതെന്നും അദ്ദേഹം വിശദമാക്കി. യുക്മ അതിന് നേതൃത്വം നല്‍കണമെന്നും അദ്ദേഹം അഭ്യര്‍ഥിച്ചു. 

യുക്മ ദേശീയ പ്രസിഡന്റ് മനോജ്കുമാര്‍ പിള്ള അധ്യക്ഷത വഹിച്ച യോഗത്തില്‍ വള്ളംകളിയുടെ ടീം രജിസ്‌ട്രേഷന്റെ ചുമതലയുള്ള ജേക്കബ് കോയിപ്പള്ളിയാണ് സി.പി. ജോണിന് രജിസ്റ്റര്‍ ചെയ്ത 24 ടീമുകളുടെ പേരുകളും അവര്‍ തിരഞ്ഞെടുത്ത ജഴ്‌സികളുടെ മോഡലുകളും മുന്‍ വര്‍ഷങ്ങളിലെ മത്സരങ്ങളുടെ വിവരങ്ങളും അടങ്ങിയ ഫയല്‍ നല്‍കിയത്. 

കഴിഞ്ഞ രണ്ട് വര്‍ഷം നടന്ന വള്ളംകളിയും കാര്‍ണിവലും സംബന്ധിച്ച വിവരങ്ങള്‍ ദേശീയ ജോ. ട്രഷററും മുന്‍ ടൂറിസം ക്ലബ് വൈസ് ചെയര്‍മാനുമായ ടിറ്റോ തോമസ് യോഗത്തില്‍ വിശദീകരിച്ചു. ഫയല്‍ വിശദമായി പരിശോധിച്ച സി.പി. ജോണ്‍ യുക്മയുടെ നേതൃത്വത്തില്‍ നടത്തപ്പെടുന്ന ഈ സംരംഭം ഒരു വന്‍വിജയമാകട്ടെയെന്ന് ആശംസിക്കുകയും സംഘാടകരെ പ്രത്യേകം അഭിനന്ദിക്കുകയും ചെയ്തു. തുടര്‍ന്നു 'കേരളാ പൂരം 2019' ചുമതലയുള്ള യുക്മ ദേശീയ വൈസ് പ്രസിഡന്റ് അഡ്വ. എബി സെബാസ്റ്റ്യന് അദ്ദേഹം ഫയല്‍ കൈമാറി. യുക്മ സൗത്ത് വെസ്റ്റ് റീജിയന്‍ മുന്‍ പ്രസിഡന്റ് വര്‍ഗീസ് ചെറിയാന്‍ സ്വാഗതവും ഓക്‌സ്മാസ് പ്രസിഡന്റ് ജയകൃഷ്ണന്‍ നായര്‍ നന്ദിയും പറഞ്ഞു. 

ഫിലിപ്പ് വര്‍ഗീസ്, സിബി കുര്യാക്കോസ്, ജുനിയ റെജി, മജോ തോമസ്, എബി പൊന്നാംകുഴി, തോമസ് ജോണ്‍, സാഞ്ചോ മാത്യു എന്നിവര്‍ പരിപാടികള്‍ക്ക് നേതൃത്വം നല്‍കി. 

വിവരങ്ങള്‍ക്ക് : മനോജ് കുമാര്‍ പിള്ള (പ്രസിഡന്റ്) 07960357679, അലക്‌സ് വര്‍ഗീസ് (ജനറല്‍ സെക്രട്ടറി) 07985641921, അഡ്വ. എബി സെബാസ്റ്റ്യന്‍ (ജനറല്‍ കണ്‍വീനര്‍) 07702862186.

റിപ്പോര്‍ട്ട്: സജീഷ് ടോം

Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക