രക്ഷാപ്രവർത്തനത്തിനടയിൽ ജീവൻ പൊലിഞ്ഞ ലിനുവിന്റെ കുടുംബത്തിന് നടൻ ജയസൂര്യ അഞ്ചുലക്ഷം രൂപ ധനസഹായം നൽകി. ലിനുവിന്റെ അമ്മയെ വിളിച്ച് സംസാരിച്ചതിന് ശേഷം ബാങ്ക് അക്കൗണ്ടിലേക്ക് അഞ്ചു ലക്ഷം രൂപ ട്രാൻസ്ഫർ ചെയ്തു നൽകുകയായിരുന്നു. സിനിമാലോകം മുഴുവൻ പ്രളയ ബാധിതർക്ക് കൈത്താങ്ങായി മുന്നോട്ട് വന്നിട്ടുണ്ട്. ലിനു ചെയ്തത് മഹത്തായ പ്രവൃത്തിയാണെന്നും ഇതൊരു മകന് നല്കുന്നതായി മാത്രം കണ്ടാല് മതിയെന്നും ജയസൂര്യ ലിനുവിന്റെ അമ്മയോട് പറഞ്ഞു.
ബേപ്പൂരിലാണ് ലിനുവിന്റെ വീട്. അച്ഛനും അമ്മയും സഹോദരങ്ങളും ഉള്പ്പെടെയാണ് കഴിഞ്ഞിരുന്നത്. വീട് മഴയെടുത്തപ്പോള് സമീപത്തെ സ്കൂളിലെ ദുരിതാശ്വാസ ക്യംപിലേക്ക് ഇവര് മാറി. ഇവിടെ നിന്നാണ് ലിനും കൂട്ടരും രക്ഷാപ്രവര്ത്തനത്തിന് ഇറങ്ങിയത്. കുണ്ടായിത്തോട് എരഞ്ഞിരക്കാട്ട് പാലത്തിനു സമീപം രക്ഷാപ്രവര്ത്തനത്തിടെ ലിനുവിനെ കാണാതായി. മണിക്കൂറുകള്ക്ക് ശേഷം ലിനുവിന്റെ ജിവനറ്റ ശരീരം സുഹൃത്തുക്കള് കണ്ടെത്തുകയായിരുന്നു.