കിഷ്കിന്ധാകാണ്ഡം എട്ടാം സർഗം മുതൽ ഇരുപത്തി അഞ്ചുവരെ

ബാലീ സുഗ്രീവ കഥകളാണിന്നത്തെ പ്രതിപാദ്യം

സുഗ്രീവനും രാമനും സംഖ്യത്തിലേർപ്പെട്ടുകൊണ്ട് സ്വന്തം കഥകൾ പറയവേ രാമൻ, സുഗ്രീവനും ബാലിയുമായുളള ശത്രുതയുടെ കാരണം അന്വേഷിച്ചു. സുഗ്രീവൻ ആ കഥ പറഞ്ഞു.

സുഗ്രീവൻ്റെ ജേഷ്ഠനാണു ബാലി.അച്ഛൻ മരിച്ചപ്പോൾ മുറപോലെ ബാലിയെ കിഷ്കിന്ധാധിപനാക്കി. സുഗ്രീവൻ ദാസനെപ്പോലെ അവനെ സേവിച്ചു വന്നു. ഒരിക്കൽ ദുന്ദുഭിയുടെ മകനായ മായാവിയുമായി ബാലി, സ്ത്രീ വിഷയത്തിലുണ്ടായ പോരിൽ ഇടഞ്ഞു.അതിൽ തോറ്റ മായാവി, ഒരു ദിവസം രാത്രി ഏവരും ഉറങ്ങിക്കിടക്കുമ്പോൾ  വന്നു ബാലിയെ പോരിനു വിളിച്ചു.എല്ലാവരുടേയും അപേക്ഷയും തള്ളി, ബാലി ആ രാത്രി തന്നെ ആ മായാവിയുടെ പിന്നാലെ ചെന്നു. ഒപ്പം സുഗ്രീവനും. മായാവി ഒരു ഗുഹയ്ക്കുള്ളിലേക്ക് ഓടിക്കയറി. അവിടെ എത്തിയ സുഗ്രീവനോട് ഗുഹക്കു പുറത്തുകാവൽ നിൽക്കുവാൻ ആവശ്യപ്പെട്ട്, ബാലി അകത്തേക്കു പ്രവേശിച്ചു.ഒരു വർഷം കഴിഞ്ഞു. ഒടുവിൽ ആ ഗുഹയിൽ നിന്നു മായാവിയുടെ അട്ടഹാസങ്ങൾ കേൾക്കുകയും പതഞ്ഞ ചോര പുറത്തേക്ക് ഒഴുകുകയും ചെയ്തു തുടങ്ങി. മായാവിയാൽ ബാലി വധിക്കപ്പെട്ടു എന്നു നിനച്ച് സുഗ്രീവൻ ആ ഗുഹാമുഖം വലിയ പാറകൊണ്ടടച്ചു കൊട്ടാരത്തിലേക്കു വന്നു.  മന്ത്രിമാരും ബാലി മരണപ്പെട്ടുവെന്നു കരുതി സുഗ്രീവനെ രാജാവാക്കി.എന്നാൽ കുറച്ചു കാലം കഴിഞ്ഞപ്പോൾ ബാലി തിരികെ വന്നു. സുഗ്രീവൻ പറഞ്ഞതൊന്നും കേൾക്കുവാൻ ബാലി കൂട്ടാക്കിയില്ല. ബാലി, സഹോദരൻ തന്നെ വഞ്ചിച്ചു എന്നു പറഞ്ഞു രാജ്യത്തു നിന്നും പുറത്താക്കി. ഭാര്യയെ അവൻ്റെതാക്കി. അങ്ങനെ ഹതാശനായ സുഗ്രീവൻ ബാലിക്കു ശാപം കിട്ടിയ ഋഷ്യ മൂകം എന്ന മലയിൽ നാലു സചിവരോടൊത്തു പാർത്തു വരികയാണ്.

ഈ കഥ കേട്ട രാമൻ, സുഗ്രീവനെ സഹായിക്കാമെന്നു വാക്കു കൊടുത്തു. എന്നാൽ രാമന് ബാലിയെ വധിക്കാനാകുമോ എന്ന കാര്യത്തിൽ സുഗ്രീവനു സംശയമുണ്ടായിരുന്നു. അവൻ പണ്ടു ദുന്ദുഭി എന്ന രാക്ഷസൻ പോത്തിൻ്റെ രൂപമെടുത്തു സാഗരത്തേയും, ഹിമവാനേയും വെല്ലുവിളിച്ചിരുന്ന കഥ പറഞ്ഞു. അന്ന് ഹിമവാൻ ദുന്ദുഭിയെ നേരിടാൻ ഭൂമിയിൽ ബാലി മാത്രമേ ഉള്ളൂ എന്നറിയിച്ചു.ദുന്ദുഭി ബാലിയെപ്പോരിനു വിളിച്ചു.ബാലിയുമായുള്ള ഏറ്റുമുട്ടലിൽ ദുന്ദുഭി ചത്തുമലച്ചു. അവൻ്റെ കുന്നോളം പോന്ന ശരീരം ബാലി, കാലിൻ്റെ തള്ളവിരൽ കൊണ്ടുത്തോണ്ടി ദൂരേക്ക് പറപ്പിച്ചു.ആ സമയം അവൻ്റെ പിണത്തിൽ നിന്നും തെറിച്ച ചോരത്തുള്ളികൾ മാതംഗാശ്രമത്തെ മലിനപ്പെടുത്തി.ഇതു കണ്ടു മാതംഗ മുനി, ആശ്രമം അശുദ്ധപ്പെടുത്തിയ ബാലിയോ കിങ്കരന്മാരോ ആശ്രമത്തിൽ കടന്നാൽ കല്ലായിപ്പോകുമെന്നു ശപിച്ചു.ആ ശാപം പേടിച്ച് ബാലിയും കൂട്ടരും ഋഷ്യ മൂകത്തേക്കു കടക്കില്ല. അതിനാലാണ് സുഗ്രീവനും നാലു സചിവരും അവിടെ താമസിച്ചു വന്നത്..

ഇത്രയും ബലവാനായ ബാലിയെ രാമൻ എപ്രകാരം വധിക്കും എന്ന കാര്യത്തിൽ സുഗ്രീവനു സംശയമുണ്ടായിരുന്നു. അവൻ മാതംഗാശ്രമത്തിൽ ഒരു കുന്നുപോലെ കിടന്ന ദുന്ദുഭിയുടെ എല്ലിൻ കൂട് കാണിച്ചു കൊടുത്തു. അതു കാലിൻ്റെ പെരുവിരൽ കൊണ്ട് പത്തു വിൽപ്പാടു നീക്കാമോ എന്നു ചോദിച്ചു.രാമനതു തളള വിരൽ കൊണ്ടു ഇരുന്നൂറു യോജേന തോണ്ടി എറിഞ്ഞു എന്നിട്ടും സുഗ്രീവനു വിശ്വാസം വരായ്കയാൽ രാമൻ, ബാലി ഒറ്റ അമ്പു കൊണ്ടു തുളച്ചിരുന്ന സാല മരങ്ങൾ ഏഴെണ്ണം ഒറ്റ അമ്പു കൊണ്ടു തുളച്ചുകാട്ടി.

സുഗ്രീവനു വിശ്വാസമായി.

അവൻ പോരിനു ബലിയെ വിളിച്ചു. പക്ഷേ കാണാൻ ഒന്നു പോലിരിക്കുന്ന ബാലി സുഗ്രീവന്മാരെ വേറിട്ടു തിരിച്ചറിയാനാകാതെ രാമൻ കുഴഞ്ഞു. ഒടുവിൽ തോറ്റു തിരിഞ്ഞോടിയ സുഗ്രീവൻ ഋഷ്യ മൂകത്തിലെത്തി. പിന്നെ രാമനിർദ്ദേശപ്രകാരം ലക്ഷ്മണൻ ഗജപുഷ്പി കൊണ്ടുണ്ടാക്കിയ മാല സുഗ്രീവനു നൽകി. അതും ധരിച്ചവൻ വീണ്ടും ബാലിയെ പോരിനു വിളിച്ചു. ഇക്കുറി താര ബാലിയോടു പോരിനിറങ്ങരുത് എന്ന് അപേക്ഷിച്ചു.രണ്ടാമതും പോരിനു വന്നുവെങ്കിൽ അവനു പിന്നിൽ ശക്തമായ ആരെങ്കിലും ഉണ്ടാകും.അതിൽ ചതിവു പറ്റും എന്നുമറിയിച്ചു.