ഇരവൊരു തിരയായെൻ
ബോധഭൂമികയുടെ
തല്പ്പമിഴി പൂട്ടുവാൻ
വന്നടുത്തോ ?
ഓർമ തൻ
ഭണ്ഡാരമാറാപ്പ് ഭാരങ്ങൾ
' അപ്പുപ്പൻ താടി' പോൽ
പൊങ്ങിക്കളിക്കുമോ ?
ചിന്തകൾ ചെന്നു തട്ടുന്നു പിന്നെയും
ചിന്തയില്ലാത്തയാ -
കബന്ധ ബിംബങ്ങളിൽ ....
ചന്ദനച്ചാർത്തിന്റെ കാന്തിയും
ചെഞ്ചിരാതിന്റെ ചുണ്ടും
ചേറിലെത്താമരത്തണ്ടും
ചിലങ്ക കെട്ടുന്ന ലാസ്യവും ...
എന്റെ മുന്നിലെത്തുന്ന-
തേതു ഭാവ നികേതമായി ....
ജീവിത വേഗ വഞ്ചി തൻ
കേവുഭാരം പിളർന്നോ ?
കക്ക വാരാൻ പോകുമെൻ
കൊക്കു വഞ്ചിയമരത്തിൽ
ഹംസമേഘങ്ങൾ തൻ
വർണച്ചിറക് വിടർത്തുമോ ..?
കാക്കത്തുരുത്തിലെ
കലപില മേളങ്ങൾ
പൂത്തുരുത്തിൽ വിരിയുന്ന
പൂമരമാകുമോ ?
മുറ്റത്തു വിരിയുന്ന
ചെമ്പനീർ പൂവിന്റെ
ചേലുകണ്ടുള്ളത്തിൽ
തേൻ കിനിയുമോ ?....
അച്ഛാ .. എന്നുള്ള
പൊൻ വിളി കേൾക്കുമ്പോൾ
ശബ്ദത്തിൻ പൊരുൾ തേടി
കണ്ണോടുമോ ., ........?
ചിന്തകൾ
ചാരു ചിന്തകളാകുമോ ?
ചിറകു വെട്ടിയ
ചാവു ചിന്തകളാകുമോ ?...
കുണ്ഡലനീയുടെ
കളകളാരവത്തിലെ
വിദ്യുത് തരംഗ
പ്രവാഹമേ.....
ഞാനറിഞ്ഞാവുമോ
ഞാനിങ്ങനെയാവുന്ന
മുൾചെടി കൊമ്പിലെ
മറവി തൻ അമാവാസി
പൂക്കൾ ....
കരിന്തിരി വിരിയുന്ന
പൂക്കൾ .........