Image

നടന്‍ വിജിലേഷ് വിവാഹിതനായി; വധു ഫേസ്ബുക്കിലൂടെ കണ്ടെത്തിയ സ്വാതി

Published on 29 March, 2021
നടന്‍ വിജിലേഷ് വിവാഹിതനായി; വധു ഫേസ്ബുക്കിലൂടെ കണ്ടെത്തിയ സ്വാതി

'മഹേഷിന്‍റെ പ്രതികാര'ത്തിലൂടെ ശ്രദ്ധേയനായ നടന്‍ വിജിലേഷ് വിവാഹിതനായി. ഫേസ്ബുക്കിലൂടെ കണ്ടെത്തിയ കോഴിക്കോട് സ്വദേശിനി സ്വാതി ഹരിദാസാണ് വധു. കോവിഡ് മാര്‍ഗനിര്‍ദേശം പാലിച്ച്‌ ലളിതമായ ചടങ്ങുകളോടെയാണ് വിജിലേഷിന്‍റെയും സ്വാതിയുടെയും വിവാഹം നടന്നത്. വരന്‍റെയും വധുവിന്‍റെയും അടുത്ത ബന്ധുക്കളും സുഹൃത്തുക്കളും മാത്രമാണ് വിവാഹ ചടങ്ങില്‍ പങ്കെടുത്തത്.

മഹേഷിന്റെ പ്രതികാരം എന്ന സിനിമയിലൂടെ മലയാള സിനിമയില്‍ ശ്രദ്ധേയനായ നടനാണ് വിജിലേഷ്. ഈ ചിത്രത്തിലെ 'എന്താല്ലേ' എന്ന ഒരൊറ്റ ഡയലോഗിലൂടെ തിയേറ്ററില്‍ കൈയ്യടി നേടിയ താരമാണ് വിജിലേഷ് കാരയാട്. ഈ സിനിമയ്ക്കു ശേഷം ഗപ്പി, അലമാര, ചിപ്പി, വിമാനം തുടങ്ങിയ മലയാള ചിത്രങ്ങളിലും ശ്രദ്ധിക്കപ്പെടുന്ന വേഷത്തില്‍ വിജിലേഷ് എത്തിയിരുന്നു.

 അമല്‍ നീരദ് സംവിധാനം ചെയ്ത 'വരത്തന്‍' എന്ന ചിത്രത്തിലെ ജിതിന്‍ എന്ന കഥാപാത്രമാണ് വിജിലേഷിന്റെ അഭിനയജീവിതത്തിലെ ഏറ്റവും ശ്രദ്ധിക്കപ്പെട്ട കഥാപാത്രം. -

കോവിഡ് വ്യാപനത്തിന് തൊട്ടുമുമ്ബ് ഫെബ്രുവരിയിലാണ് വിജിലേഷ് ഫേസ്ബുക്കില്‍ ഇട്ട 'ജീവിതത്തില്‍ ഒരു കൂട്ടുവേണം' എന്ന പോസ്റ്റ് ഏറെ ശ്രദ്ധ നേടിയത്.  

 'ജീവിതത്തില്‍ ഒരു കൂട്ട് വേണമെന്ന തോന്നല്‍ പതിവിലും ശക്തിയായി തെളിഞ്ഞു നില്‍ക്കുന്നു. ആരെങ്കിലും വന്നുചേരുമെന്ന /എവിടെയെങ്കിലും കണ്ടുമുട്ടുമെന്ന പ്രതീക്ഷയാണ് ഈ തോന്നലിനെ ഉറപ്പിച്ചുകൊണ്ടിരിക്കുന്നത്.. വഴിനീളെ മിഴി പൊഴിച്ച്‌ അന്വേഷണത്തിലാണ് എക്കാലത്തേക്കുമായുള്ള ജീവിതത്തിന്റെ കരുതലിനെ'. ഇങ്ങനെയായിരുന്നു വിജിലേഷിന്റെ പോസ്റ്റ്. ഈ പോസ്റ്റാണ് വിജിലേഷിന്റെ ജീവിതത്തിലേക്ക് സ്വാതി ഹരിദാസിനെ എത്തിച്ചത്.

 ഇതിനു ശേഷം താന്‍ തേടിക്കൊണ്ടിരുന്ന പങ്കാളിയെ കണ്ടെത്തിയെന്ന് അറിയിച്ചു ജൂലൈയിലും വിജിലേഷ് പോസ്റ്റ് ഇട്ടിരുന്നു. അതിനുശേഷം നവംബറില്‍ സ്വാതി ഹരിദാസുമൊത്തുള്ള വിവാഹ നിശ്ചയം നടന്നു.
മഹേഷിന്‍റെ പ്രതികാരത്തിലെ ചെറിയ വേഷത്തിലൂടെ സിനിമാലോകത്ത് ശ്രദ്ധേയനായ വിജിലേഷിന് ഇപ്പോള്‍ കൈ നിറയെ സിനിമകളാണ്. പീസ് എന്ന ജോജു ജോര്‍ജ്ജ് ചിത്രമാണ് അടുത്തതായി പുറത്തിറങ്ങാനിരിക്കുന്നത്.

വധുവിനെ തേടിയുള്ള വിജിലേഷിന്‍റെ ഫേസ്ബുക്ക് പോസ്റ്റ് വലിയ വാര്‍ത്തയായിരുന്നു. ഏറെ ചര്‍ച്ചയായതോടെ വിവാഹം കഴിക്കാന്‍ വൈകിയത് എന്തുകൊണ്ടാണെന്ന ചോദ്യത്തിന് വിജിലേഷ് മറുപടിയുമായി രംഗത്തെത്തിയിരുന്നു. സിനിമയും അഭിനയവുമൊക്കയായി തിരക്കിലായത് കൊണ്ട് വിവാഹത്തെ പറ്റി ചിന്തിക്കാന്‍ സമയം കിട്ടിയില്ല. നേരത്തെ വിവാഹം ആലോചിച്ചപ്പോള്‍ സ്ഥിര വരുമാനം ഇല്ലെന്ന് പറഞ്ഞ് പലരും പിന്‍മാറി. സിനിമാക്കാരനാണെന്ന് പറഞ്ഞതോടെ കള്ളും കഞ്ചാവുമൊക്കെ ആണെന്നാണ് പലരും കരുതുന്നത്. ഇതൊക്കെ കാരണമാണ് താന്‍ ഫേസ്ബുക്കിലൂടെ വധുവിനെ തേടിയതെന്നാണ് വിജിലേഷ് വ്യക്തമാക്കിയത്.
Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക