ന്യൂയോർക്ക് ഗവർണർ ആൻഡ്രൂ കോമോയ്ക്കെതിരെ ഒരു സ്ത്രീ കൂടി ആരോപണവുമായി രംഗത്ത്. 55 വയസുള്ള വിവാഹിതയും മൂന്ന് കുട്ടികളുടെ അമ്മയുമായ ഷെറി വിൽ എന്ന വീട്ടമ്മ 2017 മെയ് മാസത്തിൽ നടന്ന സംഭവമാണ് വെളിപ്പെടുത്തിയത്. ന്യൂയോർക്കിലെ ഗ്രീസിൽ വെള്ളപ്പൊക്കത്തെ തുടർന്ന് തകർന്ന തന്റെ വീട് സന്ദർശിക്കവെ, കോമോ സ്വന്തം പദവി മറന്നു തന്നെ കടന്നു പിടിക്കുകയും ചുംബിക്കുകയും ചെയ്തെന്നാണ് വിൽ പറയുന്നത്. വളരെ വിചിത്രവും അനുചിതവുമായ ആ പെരുമാറ്റം ഇപ്പോൾ ഓര്ത്താലും ഭയം തോന്നുന്നെന്ന് അവർ അഭിപ്രായപ്പെട്ടു. ഇനിയും മിണ്ടാതിരിക്കുന്നത് ശരിയല്ലെന്ന് തോന്നിയതുകൊണ്ടാണ് ഇക്കാര്യം തുറന്നുപറയുന്നതെന്ന് വിൽ കൂട്ടിച്ചേർത്തു.
'ഞാനും ഇറ്റാലിയൻ ആണ്, എന്റെ കുടുംബാംഗങ്ങൾ പരസ്പരം അഭിവാദ്യത്തിന്റെ ഭാഗമായി ചുംബിക്കാറുണ്ട്. എന്നാൽ, അപരിചിതർ തമ്മിൽ അങ്ങനെ ചെയ്യുന്നില്ല, പ്രത്യേകിച്ച് ആദ്യമായി ഒരാളെ കണ്ടുമുട്ടുമ്പോൾ' അവർ വ്യക്തമാക്കി.
ഇറ്റലിക്കാർക്കിടയിൽ അഭിവാദ്യത്തിന്റെ ഭാഗമായി ചുംബിക്കുന്നതും കെട്ടിപ്പിടിക്കുന്നതും സാധാരണമാണെന്ന് കോമോ മുൻപ് നടത്തിയ വിശദീകരണത്തിനുള്ള മറുപടി കൂടിയാണ് വീട്ടമ്മയുടെ ഈ പ്രസ്താവന.