അമ്മയാവാൻ ഒത്തിരി കൊതിക്കുന്ന ഒരുവൾക്ക്
മച്ചിയെന്ന മുദ്ര
വീണ്ടും വീണ്ടും
നെറ്റിയിൽ പതിക്കപ്പെടുമ്പോൾ ,
ആർക്കും കാണാനാവാതെ ,
ആരെയും അറിയിക്കാനാവാതെ ,
പങ്കുവയ്ക്കാനാവാതെ ,
മനസ്സിലും , ശരീരത്തിലും , സമൂഹത്തിലും
അവളേറ്റുവാങ്ങിയ മുറിവുകൾ ...
ഏകാന്തതയിലെ ദീർഘനിശ്വാസത്തിൽ
അവളുടെ വേവലിൻ്റെ ചൂട് .
ആശ്വാസവാക്ക് കേൾക്കാനാവാതെ
നുറുങ്ങിയ മനസ്സോടെ
അവൾ അഭയം തേടുന്ന
ആശുപത്രികൾ ... ദൈവങ്ങൾ ....
ചാന്ദ്രമാസങ്ങൾ ചുവന്നചാലുകൾ കീറുമ്പോൾ
തലയണയെ അവൾ കുളിപ്പിക്കാറുണ്ട് .
നീണ്ടു പോയ ചിലമാസങ്ങൾ നൽകിയ
പ്രതീക്ഷയുടെ തിളക്കം
വെലോസിറ്റ് കാർഡിലെ ഒറ്റവരയിൽ
തലതല്ലി ചാകുമ്പോൾ
പാഴായ ബീജങ്ങളുടെ കണക്കു കേട്ട്
അവളിലെ സ്ത്രീ നുറുങ്ങി ചത്തുമലച്ചത്
വേറാരും അറിഞ്ഞില്ല ;
അവളല്ലാതെ