ജറുസലേം: ഇസ്രയേല്-പലസ്തീന് സംഘര്ഷത്തിനിടെ മലയാളി യുവതി കൊല്ലപ്പെട്ടതായി വിവരം.. ഇടുക്കി കീരിത്തോട് സ്വദേശി സൗമ്യ സന്തോഷ് (32)ആണ് കൊല്ലപ്പെട്ടത്.കഴിഞ്ഞ ഏഴ് വര്ഷമായി ഇസ്രായേലില് കെയര് ടേക്കറായി ജോലി ചെയ്യുകയായിരുന്നു സൗമ്യ. ഇന്നലെ വൈകുന്നേരം താമസസ്ഥലത്തുണ്ടായ ഷെല്ലാക്രമണത്തിലാണ് സൗമ്യ മരിച്ചത്.
ഗാസ്ക അഷ്കലോണ് എന്ന സ്ഥലത്തായിരുന്നു ഇവര് താമസിച്ചിരുന്നത്. ഇന്നലെ ഭര്ത്താവുമായി വീഡിയോകോളില് സംസാരിക്കുന്നതിനിടെയാണ് ഷെല്ലാക്രമണത്തിനിരയായത്. സൗമ്യ മരിച്ചതായി ജില്ലാ ഭരണകൂടത്തിനോ അധികൃതര്ക്കോ ഔദ്യോഗിക വിവരം ലഭിച്ചില്ലെങ്കിലും സൗമ്യ മരണപ്പെട്ടതായി ബന്ധുക്കള്ക്ക് വിവരം ലഭിച്ചിട്ടുണ്ട്.
ഗാസ്ക അഷ്കലോണില് വീല്ചെയറില് കഴിയുന്ന ഒരു വൃദ്ധയെ പരിചരിക്കുകയായിരുന്നു സൗമ്യ.ഷെല് വരുന്നത് കണ്ട് ഇവര്ക്കും രക്ഷപ്പെടാന് കഴിഞ്ഞില്ല. ഫ്ളാറ്റിന്റെ ജനാല തകര്ത്താണ് ഷെല് ഇവര് താമസിക്കുന്ന മുറിയില് പതിച്ചത്.
കഞ്ഞിക്കുഴി പഞ്ചായത്തിലെ മുന്പഞ്ചായത്ത്മെമ്പര് സതീശന്റേയും സാവിത്രിയുടേയും മകളാണ് സൗമ്യ. മൃതദേഹം അഷ്ക്കലോണിലെ ബര്സിലായി ആശുപത്രിയില് സൂക്ഷിച്ചിരിക്കുന്നു. ഇസ്രയേലിലെ സൗമ്യയുടെ മലയാളി സുഹൃത്തുക്കള് ആശുപത്രിയില് എത്തി മൃതദേഹം കണ്ടു. 2017ലാണ് സൗമ്യ അവസാനം നാട്ടിലെത്തിയത്. ഭര്ത്താവും മകനും നാട്ടിലാണ്.