കാച്ചി: നടി ലീന മരിയ പോളിനും പോലീസ് അന്വേഷണസംഘത്തിനും പനമ്പള്ളിനഗര് ബ്യൂട്ടിപാര്ലര് വെടിവയ്പ്പിന്റെ മുഖ്യസൂത്രധാരനും പിടികിട്ടാപ്പുള്ളിയുമായ നിസാം സലീമിന്റെ ഭീഷണി.
വിദേശത്ത് ഒളിവിലുള്ള പ്രതി കൊച്ചിയിലെ മാധ്യമപ്രവര്ത്തകരില് ഒരാള്ക്കാണു ഭീഷണി സന്ദേശം അയച്ചിരിക്കുന്നത്. 'ലീന മരിയ പോളിനോടു തരാനുള്ള പണമാണു ചോദിച്ചത്. രവി പൂജാര ഫോണ് വിളിക്കുക മാത്രമാണു ചെയ്തത്. ഇനി അയാളെ ആവശ്യമില്ല. ലീന മരിയ പോള് എവിടെപ്പോയി ഒളിച്ചാലും ട്രാക്ക് ചെയ്യും'- നിസാം ഭീഷണി സന്ദേശത്തില് പറയുന്നു.
ഭീഷണി സന്ദേശത്തിന്റെ പൂര്ണരൂപം:
'ഞാന് നിസാം സലീമാണ്, കൊച്ചി ബ്യൂട്ടി പാര്ലര് ഷൂട്ടൗട്ടുമായി ബന്ധപ്പെട്ട്, ഇപ്പോള് ഇത്രേം കോവിഡും പ്രശ്നങ്ങളും ഉള്ളപ്പോള് രവി പൂജാരയെ ഉയര്ന്ന സുരക്ഷയില് കേരളത്തില് കൊണ്ടു വന്നിട്ട് നിങ്ങള് തെളിവെടുത്തു. പ്രതിയല്ലേ, ലീന മരിയ.. അവളെ കൊണ്ടുവന്ന് എന്താണു തെളിവെടുക്കാത്തത്? ഭീഷണിപ്പെടുത്തി പണം തട്ടുന്ന രീതി നമ്മള്ക്കില്ല. ലീന മരിയ തരാനുള്ള പണമാണു 25 കോടി രൂപ. ലീന മരിയ പോളും ഭര്ത്താവ് സുകേഷും കൂടി നിലവില് 1500 കോടി രൂപ പറ്റിച്ചിട്ടുണ്ട്. സുകേഷ് തിഹാര് ജയിലില് കിടപ്പുണ്ട്. ലീന മരിയ പോളിനെ സി.ബി.ഐ. അന്വേഷിക്കുന്നുണ്ട്. എന്നിട്ടും കേരളത്തില് കൊണ്ടുവന്നു തെളിവെടുക്കാതെ വീഡിയോ കോളാണോ ചെയ്യുന്നത്. പിന്നെ രവി പൂജാര, ഫോണ് വിളിച്ചതേ ഉള്ളൂ, പണി എടുക്കുന്നതും എടുപ്പിക്കുന്നതും നമ്മള് തന്നെയാണ്. അതുകൊണ്ടു ലീന മരിയ പോളിനെ ഇനി വിടില്ല, രവി പൂജാരയുടെ ആവശ്യവുമില്ല ഞങ്ങള്ക്ക്. കിട്ടാനുള്ള പൈസ കിട്ടിയേ പറ്റൂ'.