വി.എസ്. അച്യുതാനന്ദന് ഇന്ന് 98-ാം പിറന്നാള്‍. തിരുവനന്തപുരത്തെ വേലിക്കകത്ത് വീട്ടിലാണ് ഇപ്പോള്‍ അച്യുതാനന്ദനുള്ളത്. ഏറെ നാളായി അദ്ദേഹം വിശ്രമത്തിലാണ്. 

കോവിഡ് ഭീഷണി നിലനില്‍ക്കുന്നതിനാല്‍ ഇപ്പോള്‍ സന്ദര്‍ശകരെപ്പോലും അനുവദിക്കുന്നില്ല. 

കഴിഞ്ഞ എല്‍ഡിഎഫ് സര്‍ക്കാരിന്‍രെ കാലത്ത് ഭരണപരിഷകാര കമ്മീഷന്‍ അധ്യക്ഷനായിരുന്നു വി.എസ് . അച്യുതാനന്ദന്‍. 2021 ജനുവരിയിലാണ് അദ്ദേഹം ആ സ്ഥാനം ഒഴിഞ്ഞത്. 2019 ല്‍ പുന്നപ്ര വയലാര്‍ രക്തസാക്ഷി അനുസ്മരണത്തിന് ശേഷം തിരുവനന്തപുരത്ത് മടങ്ങിയെത്തിയ വി.എസ്. ദേഹാസ്വാസ്ഥ്യത്തെ തുടര്‍ന്ന് ആശുപത്രിയില്‍ പ്രവേശിപ്പിക്കപ്പെട്ടിരുന്നു. അന്നു മുതല്‍ സമ്പൂര്‍ണ്ണ വിശ്രമമാണ് നിര്‍ദ്ദേശിച്ചിരുന്നത്. 

പിറന്നാളാഘോഷത്തിന് പുറത്തുനിന്നാരും ഇല്ല. കുടുംബാംഗങ്ങള്‍ മാത്രം ചെറിയ തോതില്‍ ആഘോഷിക്കും. വീടിനകത്ത് വീല്‍ചെയറിലാണ് വി.എസ്. പത്രവായനയും ടെലിവിഷന്‍ കാണലും അദ്ദേഹം മുടക്കാറില്ല.

കേരളം വീണ്ടും പ്രളയ ഭീഷണിയിലായതിന്റെ വാര്‍ത്തകള്‍ വി.എസിനെ അസ്വസ്ഥനാക്കിയെന്ന് മകന്‍ വി എ അരുണ്‍ കുമാര്‍ പറഞ്ഞു. പശ്ചിമഘട്ട സംരക്ഷണത്തിനായുള്ള ഗാഡ്ഗില്‍ കമ്മിറ്റി റിപ്പോര്‍ട്ടിന്റെ ശക്തമായി അനുകൂലിച്ചിരുന്ന നേതാവാണ് വി എസ്. ഗാഡ്ഗിലിന്റെ നിര്‍ദേശങ്ങള്‍ അദ്ദേഹം ഈ ദിവസങ്ങളില്‍ ഓര്‍മിച്ചെന്നും അരുണ്‍ പറഞ്ഞതായാണ് റിപ്പോര്‍ട്ട്.