സമാനതകളില്ലാത്ത അനുഭവങ്ങളിലൂടെ മാനവരാശ് കടന്നുപോയ കൊറോണയുടെ രണ്ടുവര്‍ഷക്കാലം. 2019 ല്‍ പാശ്ചാത്യലോകം പ്രത്യേകിച്ച് അമേരിക്കന്‍ ഐക്യനാടുകളില്‍ ഉല്‍സവലഹരിയില്‍ താങ്ക്‌സ്ഗിവിംഗ് ആഘോഷിക്കുമ്പോള്‍ വരും മാസങ്ങളില്‍ അനുഭവിക്കുവാന്‍ പോകുന്ന ദുരിതത്തെകുറിച്ചു അധികമാര്‍ക്കും അറിവുണ്ടായിരുന്നില്ല. കേട്ടുകേള്‍വിപോലുമില്ലാതിരുന്ന മാരകമായ കൊറോണ വൈറസ് ചൈനയില്‍ പൊട്ടിപ്പുറപ്പെട്ട് ലോകം മുഴുവന്‍ വ്യാപിക്കുവാന്‍  ചുരുങ്ങിയ ദിനങ്ങള്‍ മാത്രമേ വേണ്ടിവന്നുള്ളൂ. അതിഭീകരമായ രോഗാവസ്ഥയില്‍ പെട്ടുഴുത് ആശുപത്രിയുടെ ഏകാന്തതയില്‍ മരണത്തോട് മല്ലടിച്ചു കിടന്ന എത്രയോ ഹതഭാഗ്യര്‍! ഉറ്റവരേയും ഉടയവരേയും ഒരു നോക്കുകാണാതെ മരണത്തിന്റെ തിരശ്ശീലക്കപ്പുറത്തേക്ക് കടന്നുപോയവര്‍. മാന്യമായ മൃതസംസ്‌ക്കാരം പോലും നിഷേധിക്കപ്പെട്ടവര്‍ അനേകര്‍ ആയിരുന്നു. സ്വന്തം ജീവനപ്പോലും തൃണവല്‍ഗണിച്ച് ആതുരശുശ്രൂഷ രംഗത്തു സഹോദരീ സഹോദരങ്ങള്‍ക്ക് എത്ര പ്രണാമര്‍പ്പിച്ചാലും മതിയാവില്ല.

അമേരിക്കന്‍ മലയാളി സമൂഹത്തിന് കണ്ണീരിന്റെ ദിനങ്ങളായിരുന്നു 2020 മാസങ്ങള്‍. ഏതാണ്ട് 50ല്‍പ്പരം മലയാളികളാണ് കൊറോണ വൈറസിന്റെ ആക്രമണത്തില്‍പ്പെട്ട് മരണപ്പെട്ടത്. രോഗചികിത്സയോ പ്രതിരോധ മാര്‍ഗങ്ങളോ ഇല്ലാതെ മാരകമായ രോഗം കാട്ടുതീ പോലെ പാടരുമ്പോള്‍ ജനങ്ങള്‍ തങ്ങളുടെ ഭവനങ്ങളില്‍ മാത്രമായി ഒതുങ്ങിക്കൂടുവാന്‍ നിര്‍ബന്ധിതരായി. പാര്‍ട്ടികളും യാത്രകളും ഇതരവിനോദങ്ങളും ജീവിതത്തിന്റെ മുഖ്യഭാഗമായ അമേരിക്കന്‍ ജനതക്ക് താങ്ങാവുന്നതിലപ്പുറമായിരുന്നു ഈ ഗ്രസ്ഥവാസം.

വേദനകളിലും പ്രയാസങ്ങളിലും സങ്കേതമാകേണ്ട ദേവാലയങ്ങള്‍ ആദ്യം തന്നെ പൂട്ടപ്പെട്ടപ്പോള്‍ പരിഭ്രാന്തരായ ജനം പലവിധകാരണങ്ങളാല്‍ നെറ്റിചുളിച്ചും. എങ്ങും അനിശിചിതാവസ്ഥ തളം കെട്ടിയ മാസങ്ങള്‍.

ശാസ്ത്രസാങ്കേതിക രംഗത്ത് എന്നും മുന്‍പന്തിയിലായ അമേരിക്കയിലെ വിദഗ്ധരായ ശാസ്ത്രജ്ഞന്‍മാരുടെ വിശ്രമരഹിത പരീക്ഷണങ്ങള്‍ ഫലപ്രാപ്തിയിലെത്തിയത് 2020 ന്റെ അവസാന മാസങ്ങളിലാണ്. മൂന്ന് പ്രശ്‌സത ഫാര്‍മസ്യൂട്ടിക്കല്‍ ഗവേഷണ കമ്പനികള്‍ കോവിഡ് 19 വാക്‌സിനേഷന്‍ അമേരിക്കന്‍ ജനതക്കായി സമര്‍പ്പിച്ചപ്പോള്‍ അത് ലോകത്തിനുതന്നെ വലിയ ആശ്വാസവും ഇതര രാഷ്ട്രങ്ങള്‍ക്ക് പ്രചോദനവുമായി.

രണ്ടായിരത്തി ഇരുപത്തിയൊന്നാം ആണ്ടിലെ താങ്ക്‌സ്ഗിവിംഗ് ദിനങ്ങളില്‍ നാമെത്തി നില്‍ക്കുമ്പോള്‍ വാക്‌സിനേഷനായി കാത്തിരുന്ന മുഴുവന്‍ ജനതക്കും അത് സൗജന്യമായി ലഭ്യമാക്കുകയും അമേരിക്കന്‍ ജനസംഖ്യയുടെ ഏതാണ്ട് 85 ശതമാനം ആളുകളും വാക്‌സിനേഷന്‍ സ്വീകരിക്കുകയും ചെയ്തു എന്നത് ഏറെ സന്തോഷകരമായ വസ്തുതയാണ്. ബിസിനസ്സ്/റിയല്‍ എസ്‌റ്റേറ്റ്/ വ്യാവസായിക മേഖലകളെയും പടിപടിയായി ഉയര്‍ച്ചയിലേക്ക് നീങ്ങുകയും ജനജീവിതം സാധാരണ നിലയിലേക്ക് മടങ്ങിവരുകയും ചെയ്തിരിക്കുന്നു.

കൊറോണ വ്യാപനവും അടിക്കടി വന്നുകൊണ്ടിരുന്ന പ്രകൃതി ദുരന്തങ്ങളും മൂലം ദുരിതക്കടലിലായ നമ്മുടെ മാതൃദേശത്തിന് പ്രത്യേകിച്ചും കേരളത്തിന് കൈയയച്ച് സഹായം നല്‍കുവാന്‍ കഴിഞ്ഞു എന്നതില്‍ അമേരിക്കന്‍ മലയാളഇകളായ നമുക്കോരോരുത്തര്‍ക്കും അഭിമാനിക്കാം.

വിളവെടുപ്പിന്റേയും നന്ദിപ്രകാശനത്തിന്റെയും മുഖമുദ്രയായി ആദ്യകാല കുടിയേറ്റക്കാരും അമേരിക്കന്‍  ആദിവാസികളും ചേര്‍ന്ന് 1621 ല്‍ ആരംഭിച്ച താങ്ക്‌സ് ഗിവിംഗ് ആഘോഷങ്ങള്‍ 1863 ലെ സിവില്‍ വാറിന്റെ കാലഘട്ടത്തില്‍ അന്നത്തെ പ്രസിഡന്റ് ഏബ്രഹാം ലിങ്കണ്‍ പുറപ്പെടുവിച്ച ഉത്തരവ് അനുസരിച്ച് എല്ലാ വര്‍ഷവും നവംബര്‍ മാസത്തില്‍ താങ്ക്‌സ് ഗിവിംഗ് ദിനം ആചരിച്ചു വരുന്നു. സ്‌നേഹവും, നന്ദിയും, പങ്കുവെക്കലും കരുതലും എല്ലാം സമന്വയിക്കുന്ന മഹത്തായ ആഘോഷമാണ് അമേരിക്കയിലെ താങ്ക്‌സ് ഗിവിംഗ്. ജാതി-മത-വര്‍ഗ-വര്‍ണ്ണ വ്യത്യാസമില്ലാതെ ഏവരും ആഘോഷിക്കുന്ന ഉല്‍സവും ഇതുതന്നെയാണ്.

പൂര്‍ണ്ണസ്വാതന്ത്ര്യവും, തുല്യ അവസരങ്ങളും, തുല്യനീതിയും ഉറപ്പായ ലോകത്തിലെ ഏറ്റവും മഹത്തായ അമേരിക്കന്‍ ഐക്യനാടുകളില്‍ എത്തിപ്പെടുവാന്‍ നമുക്കോരുത്തര്‍ക്കും ലഭിച്ച സൗഭാഗ്യത്തിന് നാമെന്നും നന്ദിയുള്ളവരായിരിക്കണം. ഈ രാജ്യത്തോടും സംസ്‌ക്കാരത്തോടും എല്ലാറ്‌റാനിനേയും നിയന്ത്രിക്കുന്ന സൃഷ്ടാവിനോടും സഹായങ്ങള്‍ വേണ്ടവരെ നമുക്ക് ചേര്‍ത്തുനിര്‍ത്താം.

ആഘോഷങ്ങളുടെയും രുചികരമായ ഭക്ഷണങ്ങളുടെയും പകിട്ടിനൊപ്പം പരസ്പരം സ്‌നേഹിക്കുവാനും, ക്ഷമിക്കുവാനും, സഹായത്തിന്റെ കൈകള്‍ ലോഭമില്ലാതെ നീട്ടുവാനും സമാധാന കാംക്ഷികളാകുവാനും നമുക്ക് കഴിയട്ടെ എന്ന് പ്രത്യാശിക്കുന്നു.

ഏവര്‍ക്കും നന്‍മകളും സന്തോഷവും നിറഞ്ഞ താങ്ക്‌സ് ഗിവിംഗ് ആശംസകള്‍.

സ്‌നേഹപൂര്‍വ്വം

ക്യാപ്റ്റന്‍ രാജു ഫിലിപ്പ്, ന്യൂയോര്‍ക്ക്