തിരുവനന്തപുരം: 15 വയസുള്ള രണ്ട് കുട്ടികള്‍ക്ക് വാക്സിന്‍ മാറി നല്‍കിയതായി പരാതി.

ആര്യനാട് സാമൂഹിക ആരോഗ്യ കേന്ദ്രത്തിലാണ് സംഭവം. 15-ാം വയസിലെടുക്കേണ്ട പ്രതിരോധ വാക്സിന്‍ സ്വീകരിക്കാന്‍ എത്തിയപ്പോഴാണ് വാക്സീന്‍ മാറി നല്‍കിയത്.

കുട്ടികളോട് പ്രായം പോലും ചോദിക്കാതെ കോവിഡ് പ്രതിരോധ വാക്സിനായ കോവിഷീല്‍ഡ് ആണ് നല്‍കിയതെന്ന് ബന്ധുക്കള്‍ പറഞ്ഞു. സംഭവുമായി ബന്ധപ്പെട്ട് പൊലീസില്‍ പരാതി നല്‍കി.

അതേസമയം, ആരോഗ്യ കേന്ദ്രത്തിലെത്തിയ കുട്ടികള്‍ക്ക് വാക്സിന്‍ എടുക്കേണ്ട സ്ഥലം മാറിയതാണ് വീഴ്ച സംഭവിക്കാന്‍ കാരണമെന്നാണ് ലഭിക്കുന്ന വിവരം.

പ്രതിരോധ കുത്തിവെയ്പ്പ് നല്‍കുന്ന ഭാഗത്തേക്ക് പോകേണ്ടതിന് പകരം ഇവര്‍ സ്ഥലം മാറി കൊറോണ വാക്സിന്‍ നല്‍കുന്നയിടത്ത് പ്രവേശിക്കുകയായിരുന്നുവെന്നും കുട്ടികള്‍ ആശുപത്രിയില്‍ നിരക്ഷണത്തിലാണെന്നും ആരോഗ്യപ്രശ്നങ്ങള്‍ ഇല്ലെന്നും ഡോക്ടര്‍മാര്‍ പറഞ്ഞു