എത്രയെഴുതിയാലും മുഴുവനാവാത്ത കദനങ്ങൾ...!
സംഭവബഹുലം, അനുഭവ തീവ്രം,നഗ്നസത്യങ്ങളുടെ വെളിപ്പെടലുകൾ,
പ്രകൃതിയുടെ താണഡവ നടനങ്ങൾ,
ഇരുളിന്റെ പകർന്നാട്ടങ്ങൾ,
പകലിന്റെ നേർക്കാഴ്ചകൾ...!
അനുഭവത്തിന്റെ ചൂടും ചൂരും,
ആവർത്തനങ്ങള- ല്ലാതാവുന്ന
ജീവിത നിമിഷങ്ങൾ...!
കണ്ണിൽ, തിമിർത്തു പെയ്ത മഴ മേഘങ്ങൾ,
പേമാരി തീർത്ത പ്രളയങ്ങൾ,
കാലത്തിന്റെ കുത്തൊഴുക്കിലുമൊഴുകാതെ....!
സന്തോഷ സന്താപങ്ങൾ വേറിട്ടറിയാത്ത
മനസ്സുകളുടെ ധർമ്മദു:ഖങ്ങൾ,
തിരിച്ചറിവു നഷ്ട്ടപ്പെട്ടവരേപ്പോൽ
തോന്നിക്കും പേക്കോലങ്ങൾ....,
എരിപൊരികൊളളും ചിന്തകൾ
ചേക്കേറുമവരുടെ സിരാപടലങ്ങൾ......!
കതിരു വിളയിച്ചു,
വിളവും കൊയ്തെടുത്തറയും പൂട്ടിക്കെട്ടി
വയലിന്റെ പച്ചപ്പിന്നൊരു മരീചിക..
ഈ അനിശ്ചിതത്വമിനി- യെന്നകലാൻ..?
കാലം, മാന്ത്രികത്തൂവലാൽ
ദിനം പ്രതിയെഴുതി നിറയ്ക്കുന്ന കടലാസുകൾ
ദിശാബോധമില്ലാതെ പറന്നു നടക്കുന്നു..
പുതുമുകുളങ്ങൾ പതിയിരിക്കും ദിനരാത്രങ്ങൾ,
മനസ്സു ചോദിക്കുന്നു
കുളിരും കായ്ക്കും മരമുണ്ടോ..?
എവിടെ നട്ടുച്ച..?
സൂര്യൻ ഉരുകിയൊലിക്കുന്നു
വാടിത്തളർന്ന കാട്ടുചെടികളോടും
വളളിപ്പടർപ്പുകളോടും
ദാഹാർത്തയായ മണ്ണ് യാചിക്കുന്നു..
ഇത്തിരി നനവ്.. എവിടെ?