താമ്പാ, ഫ്ളോറിഡ: ഭര്ത്താവിന്റെ വിയോഗ വാര്ത്ത അറിഞ്ഞ് നാട്ടിലേക്കു തിരിച്ച അമേരിക്കന് മലയാളി അനുഭവിക്കുന്ന ദുരിതങ്ങള് കരളലയിക്കുന്നതാണ്.
ഫ്ളോറിഡയില് കഴിഞ്ഞ 25 വര്ഷത്തിലേറെയായി സ്ഥിരതാമസമാക്കിയ റസ്റ്റോറന്റ് ഉടമ സാജന് കല്ലുപാലത്തിങ്കല് ആസ്തമാ സംബന്ധിച്ചുള്ള ചികിത്സയ്ക്കാണ് സെപ്റ്റംബറില് നാട്ടിലെത്തിയത്. ചിങ്ങവനത്ത് താമസമാക്കിയ ഇദ്ദേഹം ഇക്കഴിഞ്ഞ 14-നു മരണപ്പെട്ടു.
കോവിഡ് 19 രാജ്യവ്യാപകമായി പടരുന്ന സാഹചര്യത്തില് കുടുംബാംഗങ്ങള്ക്ക് പെട്ടെന്ന് നാട്ടിലെത്തുക ദുഷ്കരമായിരുന്നു. ഏറെ പ്രതിസന്ധികള് തരണം ചെയ്താണ് ഫ്ളോറിഡയില് നഴ്സ് ആയ ഭാര്യ സൂബയും രണ്ടു പെണ്കുട്ടികളും നാട്ടില് എത്തിയത്. പത്തു ദിവസം വേണ്ടിവന്നു യാത്രയ്ക്ക്. യുഎസ് ആര്മിയില് ക്യാപ്റ്റനായ മകന് ജിതിന് അവധി പോലും ലഭിച്ചില്ല.
കഴിഞ്ഞ രണ്ടാഴ്ചയായി ഈ കുടുംബം അനുഭവിക്കുന്ന യാതനകള് ചില്ലറയല്ല. അന്തര്ദേശീയതലത്തില് കൊറോണ താണ്ഡവമാടുമ്പോള് യാത്രയ്ക്ക് പലപ്പോഴും തടസം നേരിട്ടു.
മരണ സര്ട്ടിഫിക്കറ്റ് നാട്ടില് നിന്നും ലഭിക്കാന് എടുത്ത സമയം, മുംബൈ എയര്പോര്ട്ട് അധികൃതരുടെ സമീപനം, വിമാനത്തിലെ യാത്ര ഇവയൊക്കെ വളരെ ക്ലേശം നിറഞ്ഞതായിരുന്നു.
സെല്ഫ് ക്വാറന്റൈന് വേണമെന്നു മുംബൈ എയര്പോര്ട്ട് അധികൃതര് ആവശ്യപ്പെട്ടു. കൊച്ചിയിലേക്കായിരുന്നു ഫ്ളൈറ്റ് എങ്കിലും മുംബൈയില് യാത്ര അവസാനിപ്പിക്കേണ്ടിവന്നു. പിന്നീട് കര്ണ്ണാടക വഴി തമിഴ് നാട്ടിലേക്കും അവിടെ നിന്നു സ്വദേശമായ കല്ലിശേരിയിലേക്കും ബസില് യാത്ര.
കഴിഞ്ഞ ദിവസം നാട്ടില് എത്തിയ കുടുംബത്തിനു മൃതദേഹം ഒരുനോക്ക് കാണാന് ഇനി 14 ദിവസംകൂടി കാത്തിരിക്കണം.
പരേതന്റെ വൃദ്ധയായ മാതാവും, സഹോദരന്മാരായ ഫാ. റ്റോംസണ്, അരുണ് തുടങ്ങിയവര് കാര്യങ്ങള് ക്രമീകരിക്കുന്നുണ്ടെങ്കിലും ഉത്കണ്ഠാകുലരാണ്.
കൂടാതെ അമേരിക്കയിലെ വിവിധ മലയാളി സംഘടനകളും, പ്രവാസി നേതാക്കളായ തോമസ് ടി. ഉമ്മനും നിരവധി സുഹൃത്തുക്കളും എംബസിയുമായി ബന്ധപ്പെടുന്നുണ്ട്.
ഇത്തരത്തിലുള്ള പ്രതിസന്ധികള് ഇനിയും നേരിടുകയാണെങ്കില് അമേരിക്കന് മലയാളികളായ ഞങ്ങള്ക്കുള്ള വിനീതമായ ഉപദേശം മൃതദേഹം നാട്ടില് നിന്നും ഇവിടെയെത്തിക്കുക എന്നതാണ്. അതായിരിക്കും ഏറെ എളുപ്പം
ഇ-മലയാളിക്കുവേണ്ടി സജി കരിമ്പന്നൂര് റിപ്പോര്ട്ട് ചെയ്തത്.