പ്രേക്ഷകര്‍ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ഹൃദയം. നാളുകള്‍ക്ക് ശേഷം വിനീത് ശ്രീനിവാസന്‍ സംവിധാനം ചെയ്യുന്ന ചിത്രത്തില്‍ പ്രണവ് മോഹന്‍ലാലാണ് നായകനായെത്തുന്നത്. നായികയായി അഭിനയിക്കുന്നത് കല്യാണി പ്രിയദര്‍ശനും. മലയാള സിനിമയിലെ പുതുതലമുറ ഒരുമിക്കുന്ന ചിത്രമെന്ന നിലയില്‍ തന്നെ ഹൃദയം ഏറെ പ്രതീക്ഷ നല്‍കുന്നുണ്ട്. മോഹന്‍ലാലും ശ്രീനിവാസനും പ്രിയദര്‍ശനും മലയാളികള്‍ക്ക് നിരവധി നല്ല ചിത്രങ്ങള്‍ സമ്മാനിച്ചവരാണ്. ആ ചരിത്രം മക്കളും ആവര്‍ത്തിക്കുമെന്നാണ് പ്രതീക്ഷിക്കുന്നത്. എന്നാല്‍ ചിത്രത്തെ കുറിച്ചുള്ള മറ്റൊരു വിവരവും ഇപ്പോള്‍ പുറത്ത് വന്നിരിക്കുകയാണ്

പുറത്ത് വരുന്ന പുതിയ സൂചനകള്‍ പറയുന്നത് ഹൃദയം വിനീതിന്റെ തന്നെ കഥയാണ്. വിനീതിന്റേയും ഭാര്യ ദിവ്യയുടേയും പ്രണയമാണ് ചിത്രം പറയുന്നതെന്നാണ് സൂചനകള്‍ ലഭിക്കുന്നത്. വിനീതിന്റെ തന്നെ വാക്കുകളാണ് ചര്‍ച്ചകള്‍ക്ക് തുടക്കം കുറിച്ചത്. മാര്‍ച്ച് 31 ന് വിനീത് ഇന്‍സ്റ്റഗ്രാമില്‍ പങ്കുവച്ച ചിത്രമായിരുന്നു എല്ലാത്തിന്റേയും തുടക്കം. ദിവ്യയുമൊത്തുള്ള 16-ാം വാര്‍ഷികത്തിന്റെ സന്തോഷമായിരുന്നു താരം പങ്കുവച്ചത്. ഇതിനായി പോസ്റ്റ് ചെയ്തത് ഹൃദയത്തിന്റെ ലൊക്കേഷനില്‍ നിന്നുമുള്ള ചിത്രമായിരുന്നു

ഈ ചിത്രം എടുത്തത് വിനീതും ദിവ്യയും പഠിച്ച അതേ ക്യാമ്പസിലായിരുന്നു. 2004 മുതല്‍ 2006 തങ്ങള്‍ കറങ്ങി നടന്നിരുന്ന സ്ഥലമാണെന്നും വിനീത് പറഞ്ഞിരുന്നു. ഇതേ ക്യാമ്പസിലാണ് ഹൃദയത്തിന്റെ ചിത്രീകരണവും നടക്കുന്നത്. ഇതോടെ ആരാധകര്‍ സംശയം ഉന്നയിക്കുകയായിരുന്നു. നിങ്ങളുടെ പ്രണയമാണോ ചിത്രം പറയുന്നതെന്ന് ആരാധകര്‍ ചോദിക്കുകയായിരുന്നു. ഇതിന് വിനീത് നല്‍കിയ മറുപടി തങ്ങളുടെ കഥയാണെന്ന് പറയാനാകില്ല, പക്ഷെ ആ സമയത്തിന്റെ ഓര്‍മ്മകള്‍ തന്നെയാണെന്നായിരുന്നു. ഇതോടെ ആരാധകര്‍ ആവേശത്തിലായിരിക്കുകയാണ്.

ഹൃദയത്തിന്റെ ചിത്രീകരണം ലോക്ക്ഡൗണ്‍ പ്രഖ്യാപിച്ചതോടെ നിര്‍ത്തിയിരിക്കുകയാണ്. മരക്കാറിന് ശേഷം പ്രണവും കല്യാണിയും ഒരുമിക്കുന്ന ചിത്രം കൂടിയാണ് ഹൃദയം. മരക്കാര്‍ പുറത്തിറങ്ങാനിരിക്കവെയാണ് ലോക്ക്ഡൗണ്‍ പ്രഖ്യാപിക്കുന്നത്.