Image

പ്രണാമം (കവിത: ജാനറ്റ് തോമസ്, മാഞ്ചസ്റ്റർ,യു.കെ)

Published on 22 October, 2020
പ്രണാമം (കവിത: ജാനറ്റ് തോമസ്, മാഞ്ചസ്റ്റർ,യു.കെ)
പ്രിയപെട്ടവരുടെ സാമിപ്യമില്ലാതെ
കൊച്ചുമക്കളുടെ
കിളികൊഞ്ചൽ കേൾക്കാതെ
പ്രിയതേ നെഞ്ചിൽ ചേർക്കാതെ
യാത്രാമൊഴി ചൊല്ലാതെ .
കടന്നു പോയവർക്ക് പ്രണാമം!

നെഞ്ചുവിങ്ങി ശ്വസം മുട്ടി
പിടഞ്ഞപ്പോൾ തൊട്ടുതലോടി
ആശ്വാസമേകുവാനാകാതെ
പ്രിയപ്പെട്ടവർ ഏകാന്തതയിൽ
കണ്ണുനീർ  വാർക്കുമ്പോൾ

കൊടുക്കാത്ത സ്നേഹചുംബനങ്ങളും
 പറയാതെ പോയ മധുര വചസ്സും
കൂടാത്ത പിണക്കങ്ങളും
ഉണങ്ങാത്ത   മുറിവുകളും
കൊത്തിനോവിക്കുമ്പോൾ

 യാത്രാമൊഴിയേകാതെ
കണ്ടു കണ്ടങ്ങു മരിച്ചെന്ന് 
ഉറപ്പിക്കാനാവാതെ
അന്ത്യചുംബനം ഇല്ലാതെ
ആശിച്ച അന്ത്യ യാത്ര
നൽകാനാകാത്ത  വേദന
 തീരാ  നോവായി
ഉറ്റവരുടെ ചങ്ക് പൊള്ളിക്കവേ

പേറ്റുനോവാറാതെ
പൊന്നോമനയുടെ
പൂമൂഖം  കാണിക്കാനാവാതെ
പ്രിയനോട്  വിട പറയേണ്ടി വന്ന
വിധിയുടെ ക്രൂരത.

അമരത്തുറങ്ങുന്നവൻ
ഉണരുവാൻ സമയമായില്ലേ
കേൾക്കുന്നില്ലേ ഈ നിലവിളി
ജീവിതത്തോണി മുങ്ങി
 താഴും മുന്നേ ശാന്തമാകു
എന്ന് കൽപ്പിക്കുവാൻ
കനിവാകുമോ!

ആരോഗ്യവും ജീവനും  മാത്രo
 സമ്പത്താകുമ്പോൾ  
ഒരു പുനർചിന്തക്കു
കാലമായി സഹജരേ.
ജീവിക്കുക ഇന്നിൽ
നാളെത്തെ  പുലർവെട്ടം
ഒരു പ്രത്യാശ മാത്ര൦!


Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക