പതിനൊന്നാമത് യുക്മ ദേശീയ വെര്‍ച്വല്‍ കലാമേളക്ക് ഡിസംബര്‍ 12 ന് തിരി തെളിയും

EUROPE 12-Dec-2020

ലണ്ടന്‍: യശഃശരീരനായ സംഗീത ചക്രവര്‍ത്തി എസ്ബി ബാലസുബ്രഹ്മണ്യത്തിന് ആദരവ് അര്‍പ്പിച്ചുകൊണ്ട്, പതിനൊന്നാമത് യുക്മ ദേശീയ കലാമേള എസ്പിബി വെര്‍ച്വല്‍ നഗറില്‍ ഡിസംബര്‍ 12 ന് (ശനി) തിരി തെളിയും.

കോവിഡ് മഹാമാരിയുടെ പശ്ചാത്തലത്തില്‍ സാങ്കേതിക വിദ്യയുടെ സാധ്യതകള്‍ പ്രയോജനപ്പെടുത്തിക്കൊണ്ട് നടക്കുന്ന യുക്മ ദേശീയ മേള പ്രവാസ ലോകത്തിന് വേറിട്ട അനുഭവമാക്കാനുള്ള തയ്യാറെടുപ്പിലാണ് സംഘാടകര്‍.

പ്രസിദ്ധ ചെണ്ടമേളം വിദ്വാന്‍ പത്മശ്രീ പെരുവനം കുട്ടന്‍ മാരാര്‍ ആണ് പതിനൊന്നാമത് യുക്മ ദേശീയ കലാമേളയുടെ ഉദ്ഘാടകന്‍. മേളപ്പെരുക്കങ്ങളുടെ തമ്പുരാനായ ശ്രീ പെരുവനം കുട്ടന്‍ മാരാര്‍ 2011 ല്‍ പത്മശ്രീ അവാര്‍ഡിന് സമ്മാനിതനാകുകവഴി ഒരു രാജ്യത്തിന്റെ മുഴുവന്‍ ആദരവ് ഏറ്റുവാങ്ങിയ ഗുരുതുല്യനായ കലാകാരനാണ്.

യു കെ സമയം രാവിലെ 11 ന് (ഇന്ത്യന്‍ സമയം വൈകുന്നേരം 4.30) നടക്കുന്ന ഉദ്ഘാടന ചടങ്ങുകള്‍ക്കുശേഷം പ്രശസ്ത നര്‍ത്തകിയും നൃത്താധ്യാപികയുമായ മഞ്ജു സുനില്‍ അവതരിപ്പിക്കുന്ന രംഗപൂജയോടുകൂടി സമാരംഭിക്കും. സൂര്യ ടിവിയിലൂടെ അവതാരകയായി ശ്രദ്ധേയയായ യുകെ യിലെ അറിയപ്പെടുന്ന നര്‍ത്തകിയും അവതാരകയുമായ ദീപ നായര്‍ ആണ് അവതരണത്തിന്റെ മികവുമായി ദേശീയ കലാമേളയ്ക്ക് മിഴിവേകാന്‍ എത്തുന്നത്.

ഡിസംബര്‍ 12 മുതല്‍ 19 വരെ ഒരാഴ്ച നീണ്ടുനില്‍ക്കുന്ന രീതിയിലാണ് യുക്മ ദേശീയ കലാമേള മത്സരങ്ങള്‍ ക്രമീകരിച്ചിരിക്കുന്നത്. യുക്മയുടെ ഔദ്യോഗീക ഫേസ്ബുക്ക് പേജായ UUKMA യിലൂടെയാണ് മത്സരങ്ങള്‍ സംപ്രേക്ഷണം ചെയ്യപ്പെടുന്നത്. വിവിധ കാറ്റഗറികളിലും വ്യത്യസ്ത ഇനങ്ങളിലുമായി അഞ്ഞൂറിലേറെ മത്സരാര്‍ഥികളാണ് മേളയില്‍ മാറ്റുരക്കുന്നത്.

ഉദ്ഘാടന വേദിയില്‍ യുക്മ കലണ്ടര്‍ 2021 ന്റെ പ്രകാശനവും നടക്കും. 2021ലെ എല്ലാ മാസങ്ങളിലും, യുക്മ കലണ്ടര്‍ ഉപയോഗിക്കുന്നവരില്‍നിന്നും ഓരോ ഭാഗ്യശാലികളെ കണ്ടെത്തുന്ന പുതുമയാര്‍ന്ന ഒരു സമ്മാന പദ്ധതിയും സൗജന്യമായിത്തന്നെ യുക്മ ഇതോടൊപ്പം ഒരുക്കുന്നുണ്ട്.

ബ്രാന്‍ഡ്ന്യൂ Peugeot 108 കാര്‍ ഒന്നാം സമ്മാനം പ്രഖ്യാപിച്ചുകൊണ്ട് യുക്മ നടത്തിയ യു - ഗ്രാന്‍ഡ് ലോട്ടറിയുടെ സ്വര്‍ണനാണയ ജേതാക്കള്‍ക്കുള്ള സമ്മാനദാനവും ചടങ്ങില്‍ നടക്കും. മുന്‍ വര്‍ഷങ്ങളിലേതുപോലെതന്നെ, യുക്മ യു ഗ്രാന്‍ഡ് ലോട്ടറിയുടെ എല്ലാ സമ്മാനങ്ങളും സ്‌പോണ്‍സര്‍ ചെയ്തിരിക്കുന്നത് യുകെ യിലെ പ്രമുഖ മലയാളി ബിസിനസ് സംരംഭകരായ അലൈഡ് മോര്‍ട്ട്‌ഗേജ് സര്‍വീസസ് ആണ്.

വെര്‍ച്വല്‍ പ്ലാറ്റ്ഫോമിന്റെ സാധ്യതകളും വെല്ലുവിളികളും ഏറ്റെടുത്തുകൊണ്ട് യുക്മ നടത്തുന്ന ദേശീയ കലാമേള നിങ്ങളുടെ സ്വീകരണ മുറികളിലേക്കെത്തുമ്പോള്‍, അതിനെ സഹര്‍ഷം ഏറ്റെടുക്കണമെന്നും മത്സരാര്‍ഥികളെ ഹൃദയപൂര്‍വം പ്രോത്സാഹിപ്പിക്കണമെന്നും യുക്മ ദേശീയ പ്രസിഡന്റ് മനോജ്കുമാര്‍ പിള്ള, ജനറല്‍ സെക്രട്ടറി അലക്‌സ് വര്‍ഗീസ്, ദേശീയ കലാമേള കോഓര്‍ഡിനേറ്റര്‍ അഡ്.വ എബി സെബാസ്റ്റ്യന്‍, കണ്‍വീനര്‍മാരായ ലിറ്റി ജിജോ, സാജന്‍ സത്യന്‍ എന്നിവര്‍ അഭ്യര്‍ഥിച്ചു.

Please tune in our Facebook page UUKMA at 11:00 am GMT (4:30 pm IST) TODAY - Saturday 12th December 2020 for the most spectacular inaugural ceremony of UUKMA National Kalamela

റിപ്പോര്‍ട്ട്: സജീഷ് ടോം