നോര്ത്ത് അമേരിക്കയിലെ ഏറ്റവും വലിയ മലയാളി സംഘടനായ മലയാളി അസ്സോസിയേഷന് ഓഫ് ഗ്രേറ്റര് ഹ്യൂസ്റ്റണ്(മാഗ് ) ന്റെ 2021 ലെ ബോര്ഡ് ഓഫ് ഡയറക്ടേഴ്സ് ചുമതലയേറ്റു. വിനോദ് വാസുദേവന്(പ്രസിഡന്റ്), ജോജി ജോസഫ് ( സെക്രട്ടറി), മാത്യു കൂട്ടാളില്(ട്രഷറാര്), സൈമണ് വാളാച്ചേരില്(വൈസ് പ്രസിഡന്റ്), രാജേഷ് വര്ഗ്ഗീസ്(ജോ.സെക്രട്ടറി), രമേശ് അത്തിയോടി(ജോ.ട്രഷറാര്) എന്നിവര് എക്സിക്യൂട്ടീവ് അംഗങ്ങളായും. റനി കവലയില്, റജി ജോണ്, ഏബ്രഹാം തോമസ്, ഡോ.ബിജു പിള്ളി, റോയ് മാത്യൂ, ഷാജു തോമസ്, ഷിബി റോയ്, ക്ലാരമ്മ മാത്യൂസ്, സൂര്യജിത്ത് സുഭാഷിതന് എന്നിവര് ബോര്ഡ് മെമ്പര്മാരായും ഉള്ള ബോര്ഡ് ഓഫ് ഡയറക്ടേഴ്സ് ആണ് നിലവില് വന്നത്.
മറ്റ് ആസ്ഥാനമായ കേരളാ ഹൗസില് 2021 ജനുവരി 17ന്, 4 പി.എം.ന് കൂടിയ വാര്ഷിക ജനറല് ബോഡില് വച്ചാണ് പുതിയ ഭാരവാഹികള് ചുമതലയേറ്റത്.
യോഗത്തില് സ്ഥാനമൊഴിയുന്ന പ്രസിഡന്റ് ഡോ.സാം ജോസഫ് അധ്യക്ഷത വഹിച്ചു. 2020 ലെ സെക്രട്ടറി മാത്യൂസ് മുണ്ടക്കല് കഴിഞ്ഞ വര്ഷത്തെ പ്രവര്ത്തന റിപ്പോര്ട്ടും, ട്രഷറാര് ജോസ്.കെ.ജോണ് വരവ് ചെലവ് കണക്കുകളും അവതരിപ്പിച്ചു.
കോവഡ്-19 മഹാമാരിക്കിടയിലും, മാഗ് റിക്രിയേഷന് സെന്റര് പുതുക്കി പണിതത് ഉള്പ്പെടെ, ഏതാണ്ട് അന്പതിനായിരം ഡോളറിന്റെ നവീകരണ പ്രവര്ത്തനങ്ങള് ഏറ്റെടുത്ത് നടത്തുവാന് കഴിഞ്ഞത് വലിയ നേട്ടമായി ജനറല് ബോഡി വിലയിരുത്തി.
വളരെ പ്രതികൂല സാഹചര്യത്തിലും കേരളാ ഹൗസിന്റെ നവീകരണ പ്രവര്ത്തനങ്ങളും ചാരിറ്റി പ്രവര്ത്തനങ്ങളും നല്ല രീതിയില് നടപ്പിലാക്കാന് സഹായിച്ച ബോര്ഡ് ഓഫ് ഡയറക്ടേഴ്സിനും, മാഗ് മെമ്പര്മാര്ക്കും ഡോ.സാം ജോസഫ് നന്ദി രേഖപ്പെടുത്തി. മാഗ് റിക്രിയേഷന് സെന്ററിന്റെ പുനരുദ്ധാരണത്തിന് 30,000 ഡോളര് സംഭാവന നല്കിയ ശ്രീ.ശശിധരന് നായരെ അദ്ദേഹം പ്രത്യേകം പ്രശംസിക്കുകയുണ്ടായി. ചാരിറ്റി പ്രവര്ത്തനത്തിന്റെ ഭാഗമായി 6,5000 രൂപ മുടക്കി ഒരു കുടുംബത്തിന് വീട് നിര്മ്മിച്ചു നല്കിയതുള്പ്പെടെ, ഏതാണ്ട് 20,000 ഡോളറിലധികം കേരളത്തില് വിവിധ ചാരിറ്റി പ്രവര്ത്തനങ്ങള്ക്ക് വിനിയോഗിച്ചതായി സാം ജോസഫ് യോഗത്തെ അറിയിച്ചു.
നോര്ത്ത് അമേരിക്കയിലെ ഏറ്റവും വലിയ മലയാളി അസ്സോസിയേഷനായ മാഗിന്റെ പുതിയ പ്രസിഡന്റ് ആകാന് കഴിഞ്ഞതില് സന്തോഷമുണ്ടെന്നും, അതിന് തന്നെ നിയോഗിച്ച എല്ലാ മാഗ് മെമ്പര്മാരോടും നന്ദി രേഖപ്പെടുത്തുന്നതായും പുതിയ പ്രസിഡന്റ് വിനോദ് വാസുദേവന് പറഞ്ഞു. കഴിഞ്ഞ കുറെ വര്ഷങ്ങളായി മാഗില് നടക്കുന്ന വികസനപ്രവര്ത്തനങ്ങളുടെ തുടര്ച്ച ഉണ്ടാകുമെന്നും, എല്ലാവരുടെയും പ്രതീക്ഷകള്ക്കൊത്ത് പ്രവര്ത്തിക്കുവാന് ശ്രമിക്കുമെന്നും അദ്ദേഹം യോഗത്തിന് ഉറപ്പ് നല്കി.
സ്ഥാനമൊഴിയുന്ന ട്രസ്റ്റീബോര്ഡ് ചെയര്മാന് ശ്രീ.തോമസ് ചെറുകര, 2020 ലെ ബോര്ഡിന്റെ പ്രവര്ത്തനങ്ങളെ അഭിന്ദിക്കുകയും, 2021 ലെ പുതിയ ബോര്ഡിന് അതിലും നന്നായി പ്രവര്ത്തിക്കുവാന് കഴിയട്ടെ എന്ന് ആശംസിക്കുകയും ഉണ്ടായി. പുതിയതായി തിരഞ്ഞെടുക്കപ്പെട്ട സെക്രട്ടറി ജോജി ജോസഫ്, ജനറല് ബോഡിയില് പങ്കെടുക്കുന്നവര്ക്ക് നന്ദി രേഖപ്പെടുത്തി. യോഗ നടപടികള് 7 പി.എം.ന് അവസാനിച്ചു.