വിറയാർന്നൊരധരവും
നിറയുന്നൊരക്ഷിയും
പറയാതെയന്നേ പറഞ്ഞിരുന്നു
ഒരുനാളിലെന്നിലെ ഞാൻ
മണ്ണടിഞ്ഞീടിലും
ഒരു നറുനിലാവായൊരിളം
കാറ്റായ്, ഒരു കുഞ്ഞുമഴയായ്
നിന്നൊപ്പമുണ്ടാകുമെന്ന് ........
കരുതലിൻ കൂട്ടുമായ്
കഥയേറെപ്പറഞ്ഞു നാം
കനവുകൾ കണ്ടൊരാ
കൽപ്പടവിലിന്നു ഞാൻ
ഏകയായിരിക്കുന്നെവിടെയോ
മറഞ്ഞൊരാ നിഴലിനെത്തേടി......
കൂടെയുണ്ടായിരുന്നെൻ
കരുതലായി കരം ഗ്രഹിച്ചും
പറയാതെ പകുതിക്ക് വച്ച്
നീ പിൻതിരിഞ്ഞോ എൻ്റെ
കനവുകളായി നീ മാറിയെന്നോ....
മഴവില്ലുപോലെ നിറമുള്ള
മോഹങ്ങൾ മനതാരിൽ
മെല്ലെയുണർന്നതുമൊരുവേള
നിറമേകിയില്ലയെൻ ജീവിതത്തെ
അറിയുവാനെന്തേ വൈകി ഞാനും.......
നിന്നെത്തിരയുന്നു
ഞാനിന്നിവിടെയെല്ലാം
പൂക്കളിൽ ചെടികളിൽ
തെന്നലിൽ, മാരിയിൽ
ഇരുളിലും വെയിലിലും
തിരയുന്നു ഞാൻ.......