ലോസ് ആഞ്ചലസ്: ബുധനാഴ്ച രാത്രി പത്തുമണിയോടെ, നടിയും ഗായികയുമായ ലേഡി ഗാഗയുടെ വെസ്റ്റ് ഹോളിവുഡിലെ വസതിയിൽ വെളുത്ത വാഹനത്തിലെത്തിയ മോഷ്ടാക്കൾ വളർത്തുനായ്ക്കളെ മോഷ്ടിച്ച് കടന്നു. മോഷ്ടാക്കൾ കയ്യിൽ തോക്കു കരുതിയിരുന്നു. ഡോഗ് വോക്കറുടെ നെഞ്ചിൽ നാല് തവണ അവർ വെടിയുതിർത്തു. ഇയാളെ അടുത്തുള്ള ആശുപത്രിയിൽ വേഗം എത്തിച്ചതായും സുഖം പ്രാപിച്ചുവരുന്നതായും അടുത്ത വൃത്തങ്ങൾ പറഞ്ഞു.
സംഭവസമയത്ത് ലേഡി ഗാഗ ഇറ്റലിയിലായിരുന്നു. താൻ ജീവനുതുല്യം സ്നേഹിക്കുന്ന കോജി, മിസ് ഏഷ്യ എന്നീ വളർത്തുനായ്ക്കളെ നഷ്ടപ്പെട്ടതിൽ അവർ അസ്വസ്ഥയാണ്. അവയെ തിരികെ ഏൽപ്പിച്ചാൽ, ഒന്നും ചോദിക്കാതെ 5 ലക്ഷം ഡോളർ നൽകാമെന്നാണ് ഗാഗയുടെ വാഗ്ദാനം.
ഗാഗയാണ് ഉടമസ്ഥയെന്ന് അറിഞ്ഞുകൊണ്ടായിരിക്കില്ല മോഷണമെന്നും ഫ്രഞ്ച് ബുൾ ഇനത്തിൽപ്പെട്ട നായ്ക്കൾക്ക് വൻ ഡിമാൻഡ് ഉണ്ടെന്ന് അറിയാവുന്നവരാകാം അവയെ തട്ടിക്കൊണ്ടുപോയതെന്നും അന്വേഷണസംഘം അഭിപ്രായപ്പെട്ടു.