അരുതുകളേറിയതാവാം ഉലകിതി
ലരുതായ്മകളോടഭിവാഞ്ഛ.
വിലക്കിയ വഴികള് തേടിച്ചെന്നാ
വഴിയെ ഗമിക്കാനുത്സാഹം.
പ്രയത്നിക്കാതെ പ്രശസ്തിയിലേറാന്
തക്കംനോക്കിയിരിപ്പാണ്.
പേരതു ദുഷ്പേരായാല്പോലും
പാരിടമാകെ പരത്തേണം.
ഒന്നിനുമല്ലാത്തൊന്നിനു തന്നുടെ
ധാര്ഷ്ട്യജയക്കൊടി നാട്ടീടാന്.
പരനുടെ വിശ്വാസത്തില് കരടായ്.
കലഹം വിതറി നടപ്പവരേ.
പെരുമയിലേക്കുകുതിക്കാന്
കുറുവഴി തേടിനടക്കും പെണ്ണാളേ,
എവിടെയുമിരയായീടാന് നീയൊരു
ചഞ്ചലമാനസയാകാതേ.
വിലക്കിയ കനികള് ഭുജിക്കാന് വെമ്പും.
മനസ്സുകള് ചൂണ്ടയിലിരയാക്കും
വിരുതന്മാരുടെ കരവിരുതാല്,
ഉരുവായൊരു കരുമാത്രം നീ.
നാലാളറിയുവതില്പ്പരമൊരു
പരമാനന്ദം മറ്റില്ലത്രേ!!
കീര്ത്തിയിലാര്ത്തി പെരുത്തലയുന്ന
വരോര്ക്കുക വാരിക്കുഴികളനേകം.