ഞാനൊരാകാശചാരിണി
എൻ ഭ്രമണപഥത്തിലങ്ങോളവും
കണ്ടതില്ല ഞാനൊരുവരെയും
സമയ കാലങ്ങൾക്കപ്പുറമൊരു ലോകത്ത്
ചിലവിടാനായ് കുറച്ചു നേരമൊരു മോഹം
ഉദിച്ചുപോയങ്ങകലെ
ചില മിന്നും കാഴ്ച്ചകൾ
മായക്കാഴ്ചകൾ
നക്ഷത്രജാലങ്ങളോ
ആകാശഗോളങ്ങളോ
തേടിവരുന്നിതോയെന്നെ..?
സൗരയൂഥ
തമോദ്വാരമെന്നെ
ഉള്ളിലേക്കാവാഹിക്കാനൊരുങ്ങുന്നിതോ..
ആ മഹാവിസ്ഫോടനത്തിൻ
തീജ്വാലകളേറ്റു
ഞാനെരിഞ്ഞു തീരുമോ..?
ഒരുപിടി ചാരമായ് പറന്നു
വഴിയറിയാതെ
നടുക്കടലിന്റെ
നീലപ്പരപ്പിലായതു
പതിക്കുമോ?
അങ്ങനെയെന്നാകാശ
ഭ്രമണ സഞ്ചാരം
അവസാനിക്കുമോ?