ഫോമയുടെ എട്ടാമത് അന്താരാഷ്ട്ര കൺവൻഷൻ 2024 ഓഗസ്റ്റ് 8 വ്യാഴം മുതൽ ഓഗസ്റ്റ് 11 ഞായർ വരെ [3 രാവും 4 പകലും] ഡൊമിനിക്കൻ റിപ്പബ്ലിക്കിലെ പുന്റ കാനയിലുള്ള ബാർസെലോ ബവാരോ പാലസ് 5-സ്റ്റാർ ഫാമിലി റിസോർട്ടിൽ നടക്കുകയാണ്. ബാർസെലോ ബവാരോ പാലസ് ഡീലക്സ് എന്നത് പൂണ്ട കാനയിലെ ഏറ്റവും മികച്ച ബീച്ചിലാണ് സ്ഥിതി ചെയ്യുന്നത്. പവിഴപ്പുറ്റുകൾ കവചം തീർത്ത കടലിൽ സ്വിമ്മിങ് പൂളിന് സമാനമായി നീന്തിത്തുടിക്കാം. ആഡംബര ഭക്ഷണ കലവറയിൽ നിന്ന് യഥേഷ്ടം സൗജന്യമായി ഭക്ഷണവും മദ്യമുൾപ്പെടെയുള്ള പാനീയങ്ങളും കൺവൻഷനിൽ പങ്കെടുക്കുന്നവർക്ക് ആസ്വദിക്കാം.കൺവൻഷൻ സ്ഥലത്തേക്കുള്ള യാത്രാസൗകര്യവും  പാക്കേജിൽ ഉൾപ്പെടുത്തിയിട്ടുണ്ട്.
എല്ലാ മുറികളിലും മട്ടുപ്പാവുകളിലുരുന്ന് കടൽ കാഴ്ചകൾ ആസ്വദിക്കുന്നതിനും  (മുന്നിലോ ഭാഗികമായോ)  ജക്കൂസി ഉൾപ്പെടുന്ന ഹൈഡ്രോതെറാപ്പി ചെയ്യുന്നതിനും സാധിക്കും. രജിസ്‌ട്രേഷനായുള്ള എല്ലാ വിശദാംശങ്ങളും  ഫോമാ ഇൻ്റർനാഷണൽ കൺവെൻഷൻ രജിസ്‌ട്രേഷൻ വെബ്‌സൈറ്റിൽ ലഭ്യമാണ്.
 ലിങ്ക് :https://fomaa.org/sub/fomaa/page/international-convention.

ഈ അന്താരാഷ്‌ട്ര കൺവൻഷൻ, അമേരിക്കയിൽ താമസിക്കുന്ന മലയാളി സമൂഹത്തിലെ അംഗങ്ങളെ ഒരുമിച്ച് കൊണ്ടുവരുന്നതിനും സാംസ്‌കാരിക വിനിമയം, നെറ്റ്‌വർക്കിംഗ്, കമ്മ്യൂണിറ്റി ബിൽഡിംഗ് എന്നിവയ്ക്കുമുള്ള  ഒരു വേദിയായി വർത്തിക്കുമെന്നതിൽ സംശയമില്ല. ഫോമയുടെ പാരമ്പര്യം, സാമൂഹിക സേവനതല്പരത എന്നിവയോടൊപ്പം മലയാളി സാംസ്കാരിക പൈതൃകത്തിൽ അഭിനിവേശമുള്ള ആളുകളുടെ ഒത്തുചേരൽ കൂടിയാണ് ഈ കൺവെൻഷൻ. ലോകമെമ്പാടുമുള്ള സഹ അംഗങ്ങൾ, സെലിബ്രിറ്റികൾ, അതിഥികൾ എന്നിവരുമായി ആശയങ്ങൾ പങ്കുവയ്ക്കാനും സുദീർഘമായ ബന്ധം സ്ഥാപിക്കാനും ഇതിലൂടെ കഴിയും . കേരളത്തിൻ്റെ സമ്പന്നമായ പൈതൃകവും പാരമ്പര്യവും പര്യവേക്ഷണം ചെയ്യാനും ആഘോഷിക്കാനും ഫോമാ ഇൻ്റർനാഷണൽ കൺവെൻഷൻ  ആവേശകരമായ വേദിയാണ് ഒരുക്കുന്നത്.
നിരവധി അതിഥി കലാകാരന്മാരുടെയും  അസോസിയേഷൻ അംഗങ്ങളുടെയും ചടുലമായ പ്രകടനങ്ങൾ മുതൽ, ഉൾക്കാഴ്ചയുള്ള നിരവധി സെഷനുകളും നടക്കും. മലയാളികളുടെ വൈവിധ്യമാർന്ന സാംസ്കാരിക വിസ്മയങ്ങളിൽ മുഴുകാൻ ഏവർക്കും ഇതൊരു സുവർണാവസരമാണ്. പരമ്പരാഗത സംഗീതം, നൃത്തം അടക്കം മലയാളികളുടെ പൈതൃകം സംരക്ഷിക്കുന്നതിനും പ്രോത്സാഹിപ്പിക്കുന്നതിനും ലക്ഷ്യമിട്ടുള്ള മറ്റ് പ്രവർത്തനങ്ങളും ഒരുക്കിയിട്ടുണ്ട്.

 വിവിധ മലയാളി അസ്സോസിയേഷനുകളെയും കമ്മ്യൂണിറ്റി അംഗങ്ങളെയും ഒരുമിച്ചുകൂട്ടുന്നതിലൂടെ, അമേരിക്കയിൽ ചിതറിക്കിടക്കുന്ന മലയാളികളെ ഒന്നിപ്പിക്കുകയും  കുടുംബങ്ങൾക്കിടയിൽ ഐക്യവും ഐക്യദാർഢ്യവും ഊട്ടിയുറപ്പിക്കുകയാണ് ഫോമ കൺവൻഷൻ ലക്ഷ്യമിടുന്നത്. അതേ സമയം, പൂണ്ട കാനയിലെ പ്രാദേശിക സമൂഹവുമായി ഇടപഴകാനും  മനംമയക്കുന്ന ലാറ്റിൻ സംസ്‌കാരത്തിൻ്റെ ഒരു നേർക്കാഴ്ച അനുഭവിക്കുന്നതിനും അവസരമുണ്ടായിരിക്കും.
കമ്മ്യൂണിറ്റി അംഗങ്ങളെ അവരുടെ അക്കാദമിക്, പ്രൊഫഷണൽ രംഗത്ത്   ശാക്തീകരിക്കാൻ ലക്ഷ്യമിട്ടുള്ള കാര്യങ്ങളും ഉണ്ടാകും.  ദേശീയ തലത്തിലുള്ള സാഹിത്യ-കലാ മത്സരങ്ങൾക്കുള്ള  വേദിയുമുണ്ട്.ഫോമായുടെ  ഓരോ റീജിയണിലെയും വളർന്നുവരുന്ന താരങ്ങൾക്ക് പങ്കെടുക്കാനും ചാമ്പ്യൻഷിപ്പുകൾ നേടാനും അവസരമുണ്ട്.  കാർഡ് ഗെയിം, സോക്കർ, സ്‌പോർട്‌സ് ടൂർണമെൻ്റുകൾ തുടങ്ങി സാമൂഹികവും വിനോദപരവുമായ പ്രവർത്തനങ്ങൾ ഉൾപ്പെടുത്താനും ഫോമാ ഇൻ്റർനാഷണൽ കൺവെൻഷൻ സുസജ്ജമാണ്.

ഫോമാ കമ്മ്യൂണിറ്റി തമ്മിലുള്ള ബന്ധത്തിൻ്റെ മൂർത്തമായ പ്രതീകവും  അടയാളപ്പെടുത്തലുമായ സുവനീറിൻ്റെ പ്രകാശനവും  ഫോമാ ഇൻ്റർനാഷണൽ കൺവൻഷനിൽ നടക്കും. കൺവെൻഷൻ സുവനീറിൻ്റെ  സ്പോൺസർഷിപ്പ് ഏറ്റെടുക്കുന്നവർക്ക് തങ്ങളുടെ ബ്രാൻഡ് വിപുലമായ ഒരു സർക്കിളിലേക്ക്  എത്തിക്കാനാകും. ഫോമാ കമ്മ്യൂണിറ്റിക്ക് അവരുടെ സർഗ്ഗാത്മകതയും  സാഹിത്യാഭിരുചികളും പ്രദർശിപ്പിക്കാനും ഇത് വഴിയൊരുക്കും.കുടുംബങ്ങൾക്ക് സുവനീറിലൂടെ കൺവൻഷന് ആശംസകൾ നേരാം.
 ഫോമാ നാഷണൽ എക്സിക്യൂട്ടീവുകൾക്കായുള്ള തിരഞ്ഞെടുപ്പിനും കൺവൻഷൻ വേദിയാകും. പുതിയ ദിശാബോധം പകരുന്ന മറ്റൊരു നേതൃനിരയെ തിരഞ്ഞെടുക്കന്നത് സംഘടനയുടെ സുപ്രധാന നിമിഷങ്ങളിൽ ഒന്നാണ്.

ഫോമായുടെ മൂല്യങ്ങൾ, താൽപ്പര്യങ്ങൾ എന്നിവ പ്രതിഫലിപ്പിക്കുന്ന  വ്യക്തികളെ തിരഞ്ഞെടുക്കാൻ ഡെലിഗേറ്റുകൾക്ക് ഇതൊരു അവസരമാണ്.
 തിരഞ്ഞെടുപ്പുകൾ സംഘടനയ്ക്കുള്ളിൽ ഉത്തരവാദിത്തവും സുതാര്യതയും പ്രോത്സാഹിപ്പിക്കുന്നു.
ഓർഗനൈസേഷൻ്റെ ദൗത്യവും ലക്ഷ്യങ്ങളും മുന്നോട്ട് കൊണ്ടുപോകുന്നതിൽ അഭിനിവേശമുള്ള നേതാക്കളെ തിരഞ്ഞെടുക്കേണ്ടത് അത്യാവശ്യമാണ്. സംഘടനയുടെ ശേഷിയും സുസ്ഥിരതയും ഇതിലൂടെ ശക്തിപ്പെടും. തിരഞ്ഞെടുക്കപ്പെടുന്ന നേതാക്കൾ പുതിയ കാഴ്ചപ്പാടുകളും ആശയങ്ങളും വൈദഗ്ധ്യവും കാഴ്ചവയ്ക്കുകയും മലയാളി സമൂഹത്തിന് പ്രയോജനം ചെയ്യുന്ന  സംരംഭങ്ങളും തന്ത്രങ്ങളും നയിക്കുകയും ചെയ്യാൻ ഉത്തരവാദിത്തപ്പെട്ടവരായിരിക്കും. ഈ സഹകരണ മനോഭാവം കൺവെൻഷൻ പ്രവർത്തനങ്ങളിൽ സജീവമായി ഏർപ്പെടുന്നതിനും  ഫോമയുടെ വളർച്ചയ്ക്കും വിജയത്തിനും സംഭാവന നൽകുന്നതിനും ഓരോ അംഗത്തെയും  പ്രചോദിപ്പിക്കുന്നു. തിരഞ്ഞെടുപ്പ് പ്രക്രിയയിൽ സജീവമായി ഇടപെടുന്നതിലൂടെ, പ്രതിനിധികൾക്കും നേതാക്കൾക്കും ഫോമയുടെ ഭാവി ദിശ രൂപപ്പെടുത്തന്നതിൽ ഭാഗമാകാം.

കൺവെൻഷൻ സെഷനുകൾ,കലാപ്രകടനങ്ങൾ, സ്‌പോർട്‌സ്, തിരഞ്ഞെടുപ്പുകൾ എന്നിവയ്‌ക്കുപുറമേ  വാട്ടർ സ്‌പോർട്‌സ്, സ്പാ ട്രീറ്റ്‌മെൻ്റുകൾ, ഗൗർമെറ്റ് ഡൈനിംഗ് എന്നിവയുൾപ്പെടെ വേറിട്ട ഒട്ടേറെ സൗകര്യങ്ങൾ റിസോർട്ടിൽ ഒരുക്കിയിട്ടുണ്ട്.
കൺവെൻഷന് മൂന്ന് ദിവസം മുമ്പും കൺവെൻഷന് ശേഷവും ഒരേ നിരക്കിൽ  കുടുംബങ്ങൾക്ക് താമസസൗകര്യം ഉണ്ടായിരിക്കും. അവധിക്കാലം ആസ്വദിക്കാൻ ഇതിലും മികച്ച അവസരമില്ല.

പുന്റ കാനയുടെ അതിമനോഹരമായ ബീച്ചുകളുടെയും ടർക്കോയ്സ് വെള്ളത്തിൻ്റെയും പശ്ചാത്തലത്തിൽ സജ്ജീകരിച്ചിരിക്കുന്ന   ബാഴ്‌സലോ ബവാരോ ഗ്രാൻഡ് റിസോർട്ടിലെ കൺവൻഷൻ വേദി  അതിശയകരവും മനോഹരവുമാണ്യ.പങ്കെടുക്കുന്നവർക്കും കുടുംബങ്ങൾക്കും കരീബിയൻ കടലിൻ്റെ സൗന്ദര്യം ആവോളം ആസ്വദിക്കാം. സാംസ്കാരിക പ്രകടനങ്ങളിൽ പങ്കെടുക്കുകയും ചെയ്യാം. 
ഫോമയുടെ ഊർജ്ജസ്വലരായ 12 റീജിയണുകളിൽ നിന്നും കൺവൻഷനിൽ പങ്കെടുക്കാൻ അംഗങ്ങൾ ഒഴുകിയെത്തുമെന്നും ഇത്  അവിസ്മരണീയമാക്കി മാറ്റുമെന്നുമാണ് സംഘടനാനേതൃത്വം പ്രതീക്ഷിക്കുന്നത്.