കേരളത്തിന്റെ മെഡിക്കല് വിദ്യാഭ്യാസരംഗം, സാധാരണക്കാരെ
മുന്നില്ക്കണ്ടുകൊണ്ടുള്ള ശക്തമായ മുന്നേറ്റം തുടരുകയാണ്. സംസ്ഥാനത്തെ
മുഴുവന് ജനങ്ങള്ക്കും ലോകത്തെവിടെയും ലഭ്യമായ മികച്ച ചികിത്സ
ലഭ്യമാക്കുക, വിദ്യാര്ത്ഥികള്ക്ക് കേരളത്തില്ത്തന്നെ
പഠനസൗകര്യമൊരുക്കുക എന്നീ ലക്ഷ്യങ്ങളോടെ എല്ലാ ജില്ലകളിലും പുതിയ
മെഡിക്കല് കോളേജുകള് ആരംഭിക്കാനുള്ള സര്ക്കാരിന്റെ തീരുമാനം
രാജ്യത്തിനുതന്നെ മാതൃകയായി മാറിയിരിക്കുന്നു. അഞ്ച് ഗവ. മെഡിക്കല്
കോളേജുകള് മാത്രമുണ്ടായിരുന്ന സംസ്ഥാനത്ത് ഇപ്പോള് അവയുടെ എണ്ണം
പതിനാറാവുകയാണ്. നാലുവര്ഷത്തിനകം നാല് പുതിയ മെഡിക്കല് കോളേജുകളാണ്
ആരംഭിച്ചത്.
ഭാരതത്തിന്റെ പ്രഥമ പ്രധാനമന്ത്രി പണ്ഡിറ്റ്
ജവഹര്ലാല് നെഹ്റു, കേരളം പിറവിയെടുത്ത 1951 ല് ഉദ്ഘാടനം ചെയ്ത,
സംസ്ഥാനത്തെ പ്രഥമ മെഡിക്കല് കോളേജായ തിരുവനന്തപുരം ഗവ. മെഡിക്കല്
കോളേജിനുശേഷം അനന്തപുരിയില് മറ്റൊരു ഗവ. മെഡിക്കല് കോളേജ് ഇന്ന് (ഫെബ്രുവരി 24)
യാഥാര്ഥ്യമാവുകയാണ്. നിലവിലുള്ള തിരുവനന്തപുരം മെഡിക്കല് കോളേജ്, രോഗീ
ബാഹുല്യത്താലും സ്ഥലപരിമിതിയാലും വീര്പ്പുമുട്ടുന്ന സാഹചര്യത്തില്
ആയിരക്കണക്കിന് സാധാരണക്കാരുടെ ആവശ്യം കണക്കിലെടുത്താണ് പുതിയ
മെഡിക്കല് കോളേജ് ആരംഭിക്കുന്നത്. ജനറല് ആശുപത്രിയേയും തൈക്കാട്
ആശുപത്രിയേയും സംയോജിപ്പിച്ചു കൊണ്ട് തുടങ്ങുന്ന ഈ മെഡിക്കല് കോളേജില് നമ്മുടെ
നാട്ടിലെ മിടുക്കരായ ഒട്ടേറെ വിദ്യാര്ത്ഥികള്ക്ക് മെഡിക്കല്
വിദ്യാഭ്യാസത്തിന് അവസരമൊരുങ്ങുകയാണ്. ഇവിടെ ഈ വര്ഷം 100
വിദ്യാര്ത്ഥികള്ക്ക് പ്രവേശനം ലഭിക്കുമെന്നാണ്
പ്രതീക്ഷിക്കുന്നത്.
സംസ്ഥാനത്ത് വീണ്ടുമൊരു ഗവണ്മെന്റ്
മെഡിക്കല് കോളേജ് എന്ന സ്വപ്നം 1982 നുശേഷം യാഥാര്ത്ഥ്യമായത്, 2013
ല് മഞ്ചേരി മെഡിക്കല് കോളേജ് നിലവില് വന്നതോടെയാണ്.
ഇടുക്കിയിലും പാലക്കാടുമാണ് പിന്നീട് മെഡിക്കല് കോളേജുകള്
തുടങ്ങിയത്. പട്ടികജാതി വികസനവകുപ്പിന്റെ ആഭിമുഖ്യത്തില് 100
എംബിബിഎസ് സീറ്റുകളോടെ ആരംഭിച്ച പാലക്കാട് മെഡിക്കല് കോളേജിലെ
70 ശതമാനം സീറ്റുകളും പട്ടികജാതിയില്പ്പെട്ട
വിദ്യാര്ത്ഥികള്ക്കുള്ളതാണ്. കൊച്ചി മെഡിക്കല് കോളേജ് സര്ക്കാര്
ഏറ്റെടുത്തു. കോന്നി, കാസര്ഗോഡ്, വയനാട്, ഹരിപ്പാട്
എന്നിവിടങ്ങളില്ക്കൂടി, പുതിയ ഗവ. മെഡിക്കല് കോളേജുകള്
ആരംഭിക്കുന്നതിനുള്ള പ്രവര്ത്തനങ്ങള് പുരോഗമിക്കുകയാണ്.
പരിയാരം മെഡിക്കല് കോളേജ് ഏറ്റെടുക്കാന് തീരുമാനമായി. ഇതിനായി
ഇത്തവണത്തെ ബഡ്ജറ്റില് 100 കോടി രൂപ വകയിരുത്തിയിട്ടുണ്ട്. കൊല്ലം
പാരിപ്പള്ളി ഇ.എസ്.ഐ. ആശുപത്രിയും അനുബന്ധ സ്ഥാപനങ്ങളും
ഏറ്റെടുക്കാനും തത്വത്തില് തീരുമാനമായിട്ടുണ്ട്. ഇത് മെഡിക്കല്
കോളേജായി സമാരംഭിക്കുന്നതിനുള്ള ക്രമീകരണങ്ങളും
പുരോഗമിക്കുകയാണ്. പുതിയ മെഡിക്കല് കോളേജുകള്ക്കായി 86.50 കോടി രൂപ
പുതിയ ബഡ്ജറ്റില് വകയിരുത്തിയിട്ടുണ്ട്.
പുതിയ മെഡിക്കല്
കോളേജുകള് ആരംഭിച്ചതോടെ സംസ്ഥാനത്തെ ഗവ. മെഡിക്കല് സീറ്റുകളുടെ എണ്ണം 950
ല്നിന്നും 1250 ആയി ഉയര്ന്നു. 30 ശതമാനത്തോളം വര്ധനവ്! സ്വാശ്രയ
മെഡിക്കല് കോളേജുകളിലെ 775 ഗവ. മെറിറ്റ് സീറ്റുകള് ഇവയ്ക്കുപുറമെയാണ്.
മെഡിക്കല് പ്രവേശനത്തിനായി അന്യ രാജ്യങ്ങളെയും സംസ്ഥാനങ്ങളെയും
ആശ്രയിച്ചിരുന്ന കേരളത്തിലെ സാധാരണക്കാരായ നൂറുകണക്കിന്
വിദ്യാര്ത്ഥികള്ക്ക്, പുതിയ മെഡിക്കല് കോളേജുകളുടെ ആവിര്ഭാവം
വലിയ ആശ്വാസമായിരിക്കുകയാണ്.
സംസ്ഥാനത്തെ പഴയ ഗവ.
മെഡിക്കല് കോളേജുകള് അവയുടെ പ്രവര്ത്തനസപര്യയിലെ ഏറ്റവും
തിളക്കമാര്ന്ന കാലഘട്ടത്തിലൂടെയാണ് മുന്നേറുന്നത്. അടിസ്ഥാന
സൗകര്യവികസനം, ഉദ്യോഗസ്ഥ നിയമനം, ചികിത്സാഗുണനിലവാരം
മെച്ചപ്പെടുത്തല്, മികച്ച ആതുരസേവന നിര്വ്വഹണം
എന്നിവയിലെല്ലാം മുമ്പെങ്ങുമില്ലാത്ത പുരോഗതി ദൃശ്യമാണ്.
തിരുവനന്തപുരം മെഡിക്കല് കോളേജിനെ മികവിന്റെ കേന്ദ്രമാക്കുന്നതിനുള്ള
പ്രവര്ത്തനങ്ങള് പുരോഗമിക്കുകയാണ്. എല്ലാ സ്പെഷ്യാലിറ്റി വിഭാഗങ്ങളും
ഒരേ കെട്ടിടത്തില് സജ്ജമാക്കി, ചികിത്സാനിലവാരവും സൗകര്യങ്ങളും ആഗോള
നിലവാരത്തിലെത്തിക്കാന് ലക്ഷ്യമിട്ടുകൊണ്ടുള്ള 26 കോടി രൂപയുടെ ഏഴ്
നിലകളുള്ള, മള്ട്ടി സ്പെഷ്യാലിറ്റി - പോളി ട്രോമാ ബ്ലോക്ക്, 27 കോടി രൂപയുടെ
നാല് നിലകളുള്ള മള്ട്ടി ഡിസിപ്ലിനറി റിസര്ച്ച് ലാബ്, ആധുനിക അനിമല് ഹൗസ്,
24 കോടി രൂപയുടെ ഫാര്മസി-ഡെന്റല്-പാരാമെഡിക്കല് ഹോസ്റ്റല് സമുച്ചയം
എന്നിവയുടെ നിര്മ്മാണം അന്തിമഘട്ടത്തിലാണ്. ബേണ്സ് യൂണിറ്റ്, ഡ്രഗ്
ടെസ്റ്റിംഗ് ലാബ്, ആധുനിക കാര്ഡിയാക് ഐസിയു, ലിവര് ട്രാന്സ്പ്ലാന്റ്
ഐ.സി.യു., എച്ച്.എല്.എ ലാബ്, ജീവനക്കാര്ക്കുവേണ്ടി 12 ഫ്ളാറ്റുകളടങ്ങിയ
പാര്പ്പിട സമുച്ചയം മുതലായവ ആരംഭിച്ചു. ദക്ഷിണേന്ത്യയിലെ സര്ക്കാര്
മേഖലയിലുള്ള ആദ്യത്തെ ഐ.വി.എഫ് യൂണിറ്റ് എസ്.എ.ടി ആശുപത്രിയില്
ആരംഭിച്ചു. 24 കോടി രൂപ വിനിയോഗിച്ച് നിര്മ്മിച്ച മാതൃശിശു മന്ദിരം
തുറന്നു.
തിരുവനന്തപുരം റീജ്യണല് കാന്സര് സെന്റര്,
വികസനസപര്യയുടെ നാള്വഴികളില് അതിവേഗം മുന്നേറുകയാണ്. പിന്നിട്ട
അഞ്ച് വര്ഷക്കാലയളവില്, കാന്സര് ചികിത്സാരംഗത്തെ ഈ മഹത്സ്ഥാപനം
അപൂര്വ്വ നേട്ടങ്ങളാണ് കൈവരിച്ചത്. സ്റ്റേറ്റ് ഇന്സ്റ്റിറ്റിയൂട്ട്
പദവിയും ഇന്ത്യയിലെ ആദ്യത്തെ കാന്സര് ചികിത്സാ സ്ഥാപനത്തിനുള്ള
എന്എബിഎച്ച് അക്രഡിറ്റേഷനും കരസ്ഥമാക്കി. 38 കോടി രൂപ ചെലവില് പുതിയ
ഒപി ബ്ലോക്ക് നിര്മ്മിച്ചു. സര്ക്കാര് മേഖലയിലെ ആദ്യത്തെ പെറ്റ് സ്കാന്
യൂണിറ്റും സിംലാബും തുടങ്ങി. അടുത്തഘട്ടം വികസനത്തിനായി പുലയനാര്
കോട്ടയില് ആരോഗ്യവകുപ്പിന്റെ 15 ഏക്കര് സ്ഥലം അനുവദിച്ചു. പശ്ചാത്തല
സൗകര്യവിപുലീകരണത്തിനും ഭൗതിക സാഹചര്യങ്ങള്
മെച്ചപ്പെടുത്തുന്നതിനുമായി 59.35 കോടിരൂപയാണ് ഇത്തവണത്തെ ബഡ്ജറ്റില്
വകയിരുത്തിയിട്ടുള്ളത്.
ആലപ്പുഴ മെഡിക്കല് കോളേജില് ഡ്രഗ്
ടെസ്റ്റിംഗ് ലാബ് തുടങ്ങി. സീവേജ് ട്രീറ്റ്മെന്റ് പ്ലാന്റിന്റെ നിര്മ്മാണം
പൂര്ത്തിയായി. ട്രോമാകെയര് യൂണിറ്റിനായുള്ള പ്രവര്ത്തനങ്ങള്
ആരംഭിച്ചു. കോട്ടയം മെഡിക്കല് കോളേജില് കോക്ലിയര് ഇംപ്ലാന്റേഷന്
യൂണിറ്റും, ഐവിഎഫ് യൂണിറ്റും തുടങ്ങി. ഹൃദ്രോഗ ചികിത്സാ സൗകര്യങ്ങള്
വിപുലപ്പെടുത്തിയതുമൂലം, സര്ക്കാര് മേഖലയിലെ ആദ്യത്തെ
ഹൃദയംമാറ്റിവയ്ക്കല് ശസ്ത്രക്രിയ ഇവിടെ സാധ്യമായി. കാന്സര്
ചികിത്സയ്ക്കുള്ള സി.റ്റി സ്റ്റിമുലേറ്റര്, ലീനിയര് ആക്സിലറേറ്റര്
മുതലായവ സ്ഥാപിക്കുന്നതിനുള്ള നടപടികള് പൂര്ത്തിയായിക്കഴിഞ്ഞു. പുതിയ
കാഷ്വാലിറ്റി ബ്ലോക്കിന്റെയും ഫാര്മസി കോളേജ് കെട്ടിടത്തിന്റെയും നിര്മ്മാണം
പുരോഗമിക്കുകയാണ്. തൃശൂര് മെഡിക്കല് കോളേജില് ബേണ്സ് യൂണിറ്റ്
സ്ഥാപിതമായി. സൈക്കിയാട്രിക് ഡിപ്പാര്ട്ട്മെന്റ് നവീകരിച്ചു. കാത്ത്ലാബ്
സജ്ജമാക്കിവരികയാണ്. കോഴിക്കോട് മെഡിക്കല് കോളേജില് ഐവിഎഫ് യൂണിറ്റ്
തുടങ്ങി. പുതിയ അക്കാദമിക് ബ്ലോക്ക് നിര്മ്മിച്ചു. ലുക്കീമിയ വാര്ഡ്
സജ്ജമാക്കിവരികയാണ്. ലക്ചര് തീയറ്റര് കോംപ്ലക്സ് നിര്മ്മാണം
പൂര്ത്തിയാകാറായി. രണ്ടാമത്തെ കാത്ത്ലാബ് ഉടന്
പ്രവര്ത്തനമാരംഭിക്കും.
ആരോഗ്യ സര്വ്വകലാശാലയ്ക്ക്, 36 കോടി രൂപ
ചെലവില്, എട്ടുനിലകളുള്ള ആസ്ഥാനമന്ദിരം നിര്മ്മിച്ചു. അക്കാദമിക്
സ്റ്റാഫ് കോളേജും റീജിയണല് സെന്ററുകളും യാഥാര്ത്ഥ്യമാക്കി. മെഡിക്കല്
വിദ്യാഭ്യാസരംഗത്തെ പരീക്ഷാ സമ്പ്രദായം കുറ്റമറ്റതാക്കി. 14
ജില്ലകളിലായി പ്രവര്ത്തിക്കുന്ന 262 അഫിലിയേറ്റഡ് കോളേജുകളിലും
പരീക്ഷാഫലങ്ങള് സമയബന്ധിതമാക്കിയതോടെ, വിദ്യാര്ത്ഥികള്ക്ക്
അക്കാദമിക് വര്ഷം നഷ്ടപ്പെടാതായി. ഗവേഷണരംഗം
വിപുലീകരിച്ചു.
സര്ക്കാര് ഏറ്റവും മുന്തിയ പരിഗണന നല്കുന്നത്
ആരോഗ്യവകുപ്പിനാണ്. ഇത്തവണത്തെ ബഡ്ജറ്റില് 1013.11 കോടി രൂപയാണ്
ആരോഗ്യമേഖലയ്ക്കുവേണ്ടി വകയിരുത്തിയിട്ടുള്ളത്. കഴിഞ്ഞ
വര്ഷത്തേതിനെ അപേക്ഷിച്ച് 52.26 ശതമാനത്തിന്റെ വര്ധനവ്. ഇത്രയും തുക
അനുവദിക്കുന്നത് ചരിത്രത്തിലാദ്യമാണ്. ഈ സര്ക്കാരിന്റെ കാലത്ത്
മെഡിക്കല് വിദ്യാഭ്യാസ മേഖലയിലും പൊതുജനാരോഗ്യമേഖലയിലും അതുല്യമായ
നേട്ടങ്ങള് കൈവരിക്കാന് സാധിച്ചതില് തികഞ്ഞ ചാരിതാര്ത്ഥ്യമുണ്ട്.
സംസ്ഥാനത്തെ പത്താമത്തെ ഗവ. മെഡിക്കല് കോളേജാണ് ഫെബ്രുവരി 24-നു
ഉച്ചകഴിഞ്ഞ് 3 മണിക്ക് തിരുവനന്തപുരത്ത് മുഖ്യമന്ത്രി ഉമ്മന്ചാണ്ടി
ഉദ്ഘാടനം ചെയ്യുന്നത്.