ഭക്തജനലക്ഷങ്ങളുടെ ആത്മസമര്പ്പണത്തോടെ വീണ്ടും ചരിത്രം കുറിച്ച
ആറ്റുകാല് പൊങ്കാല, കൂട്ടായ്മയുടെ മഹത്തായ വിജയമാണെന്ന് ദേവസ്വംമന്ത്രി
വി.എസ്. ശിവകുമാര് പറഞ്ഞു. എല്ലാ വകുപ്പുകളുടെയും ഏകോപനച്ചുമതല
കുറ്റമറ്റ രീതിയില് നിര്വ്വഹിച്ച, ജില്ലാ കളക്ടര് ബിജുപ്രഭാകറിന്റെ
നേതൃത്വത്തിലുള്ള റവന്യൂ ഉദ്യോഗസ്ഥരെ അദ്ദേഹം പ്രത്യേകം അഭിനന്ദിച്ചു.
ഭക്തജനത്തിരക്ക് നിയന്ത്രിക്കുന്നതിലും ഗതാഗതം സുഗമമാക്കുന്നതിലും
ദക്ഷിണമേഖലാ എഡിജിപി പത്മകുമാറിന്റെയും ഐജി മനോജ് എബ്രഹാമിന്റെയും
സിറ്റി പോലീസ് കമ്മീഷണര് എസ്. സ്പര്ജന്കുമാറിന്റെയും നേതൃത്വത്തിലുള്ള
മുഴുവന് പോലീസ് സേനാംഗങ്ങളും അഭിനന്ദനീയമായ മികവു പുലര്ത്തി.
അഗ്നിശമനസേന, അനിഷ്ടസംഭവങ്ങള് ഒന്നുംതന്നെ ഉണ്ടാകാത്ത വിധത്തില്
കുറ്റമറ്റ സുരക്ഷാക്രമീകരണങ്ങളാണ് ഏര്പ്പെടുത്തിയത്. ഡിഎംഒ: ഡോ. കെ.
വേണുഗോപാലിന്റെയും ഡിപിഎം: ഡോ. ബി. ഉണ്ണിക്കൃഷ്ണന്റെയും നേതൃത്വത്തിലുള്ള
ആരോഗ്യപ്രവര്ത്തകരും മെച്ചപ്പെട്ട പ്രവര്ത്തനം കാഴ്ചവച്ചു.
പൊങ്കാലക്കുവേണ്ടി പ്രത്യേകമായി 12 അര്ബന് പിഎച്ച്സികള് തുറന്നു
പ്രവര്ത്തിപ്പിച്ചു. 24 മണിക്കൂറും 108 ആംബുലന്സ് സര്വ്വീസ് നടത്തി.
ഭക്ഷ്യസുരക്ഷാ കമ്മീഷണര് ടി.വി. അനുപമയുടെ നേതൃത്വത്തിലുള്ള
ഭക്ഷ്യസുരക്ഷാവിഭാഗം അവസരത്തിനൊത്ത് ഉണര്ന്നു
പ്രവര്ത്തിച്ചു.
പൊങ്കാലയ്ക്കുശേഷം എല്ലാ ഭക്തജനങ്ങളും വളരെ
സംതൃപ്തിയോടെയാണ് മടങ്ങിയത്. ഇതിനുവേണ്ട സജ്ജീകരണങ്ങളെല്ലാം ഒരുക്കിയ
കെ.എസ്.ആര്.ടി.സിയും റെയില്വേയും അഭിനന്ദനങ്ങളര്ഹിക്കുന്നു. നഗരസഭ
ശുചീകരണകൃത്യങ്ങള് മികച്ച രീതിയില് നടത്തി. വാട്ടര് അതോറിട്ടി,
വൈദ്യുതിബോര്ഡ്, പൊതുമരാമത്ത് വകുപ്പ്, ഭാരതീയ ചികിത്സാ വകുപ്പ്, ഹോമിയോ
വകുപ്പ് എന്നിവയിലെ ജീവനക്കാരെല്ലാം സമര്പ്പിതമനസ്സോടെ പ്രവര്ത്തിച്ചു.
വി.എല്. വിനോദിന്റെ നേതൃത്വത്തിലുള്ള ക്ഷേത്രം ട്രസ്റ്റ് ഭാരവാഹികള്
ഭക്തജനസഞ്ചയത്തിനാവശ്യമായ ഒട്ടേറെക്കാര്യങ്ങള് വളരെ കൃത്യതയോടെ
ചെയ്തു. ഇവര്ക്കെല്ലാം ദേവസ്വം മന്ത്രി കൃതജ്ഞത രേഖപ്പെടുത്തി. എല്ലാ
ഭക്തജനങ്ങള്ക്കും ആശംസകള് നേര്ന്നു.