ചിക്കാഗോ: കേരളാ ഹിന്ദൂസ് ഓഫ് നോര്ത്ത് അമേരിക്കയുടെ ആഭിമുഖ്യത്തില്
സനാതനധര്മ്മത്തിന്റെ പ്രചാരണാര്ത്ഥം 2017 ജൂലൈ ഒന്നു മുതല് നാലുവരെ
സംഘടിപ്പിക്കുന്ന ലോക ഹൈന്ദവ സംഗമത്തിന് മെട്രോ ഡിട്രോയിറ്റില്
അത്യാധുനിക സജ്ജീകരണങ്ങളോടെ പുനര്നിര്മ്മാണം നടന്നുകൊണ്ടിരിക്കുന്ന
എഡ്വേര്ഡ് വില്ലേജ് വേദിയാകുന്നു.
ലോകോത്തര വേദപണ്ഡിതന്മാരുടെ
ദാര്ശനിക സംവാദങ്ങള്ക്കും ഭാരതീയ ആദ്ധ്യാത്മികതയുടെ വ്യാഖ്യാന
പരമ്പരകള്ക്കും സാക്ഷ്യംവഹിക്കുന്ന മഹാസമ്മേളനത്തില്
രാഷ്ട്രീയ-സാമൂഹിക-സാംസ്കാരിക- ചലച്ചിത്ര രംഗത്തെ പ്രമുഖരും
പങ്കെടുക്കുന്നതാണ്.
ഈശ്വരനെ സ്നേഹിച്ചപോലെ ജീവിതത്തേയും
സ്നേഹിച്ച ഭാരതത്തിന്റെ അനാഥിയായ ആത്മീയത കഠിനമായ ജീവിതയാഥാര്ത്ഥ്യങ്ങളെ
അത്മസംസ്കാരത്തിലൂടെ അനായാസേന തരണം ചെയ്യാമെന്നു പഠിപ്പിക്കുന്നു.
മഹാമഹര്ഷിമാരായ വൈശമ്പായനും, കപിലനും, പതഞ്ജലിയും, ഭരതമുനിയും,
വാത്സ്യായനും തങ്ങളുടെ ഉത്ബോധങ്ങളിലൂടെ മനുഷ്യമനസ്സുകളെ
നൂറ്റാണ്ടുകളായി നിരന്തരം സ്വാധീനിച്ചുകൊണ്ടിരിക്കുന്നു.
അതിഭൗതീകതയും മതമൗലീകതയും അരങ്ങുതകര്ക്കുന്ന ഇക്കാലത്ത് മതാതീതമായ
ആത്മീയതയും മാനവീകതയും ചര്ച്ചയാകുന്ന സമ്മേളനത്തില് അമേരിക്കയില്
നിന്നും മറ്റു രാജ്യങ്ങളില് നിന്നുമായി രണ്ടായിരത്തിനു മുകളില്
പ്രതിനിധികള് പങ്കെടുക്കുമെന്നു പ്രസിഡന്റ് സുരേന്ദന് നായരും,
സെക്രട്ടറി രാജേഷ് കുട്ടിയും പ്രതീക്ഷിക്കുന്നു.
സ്വാമി സത്യാനന്ദ
സരസ്വതി തിരുവടികളുടെ നാമഥേയത്തില് വടക്കേ അമേരിക്കയിലെ പ്രശസ്തനായ
ക്ഷേത്രകലാശില്പി നാരായണന് കുട്ടപ്പനും, ഡിട്രോയിറ്റിലെ അനുഗ്രഹീത
നിര്മ്മാണ കലാപ്രതിഭ സുദര്ശന കുറുപ്പും ചേര്ന്ന് അണിയിച്ചൊരുക്കുന്ന
സമ്മേളന നഗരിയില് താത്കാലിക ക്ഷേത്രവും കൊടിമരവും ഗോപുരകവാടങ്ങളും,
നാലമ്പലങ്ങളും പുനര്ജ്ജനിക്കുന്നു. ഓംകാര മന്ത്രം മുഴങ്ങുന്ന
ക്ഷേത്രാന്തരീക്ഷത്തിന്റെ പൂര്ണ്ണപ്രതീതി അനുഭവിച്ചറിയുകതന്നെ വേണം.
കൊടിയേറ്റത്തിനു മുന്നോടിയായി ഹോട്ടല് സമുച്ചയത്തിന്റെ വിശാലമായ
പൂമുഖത്ത് വര്ണ്ണശബളമായ സാംസ്കാരിക ഘോഷയാത്ര നടക്കും. മലയാളക്കരയിലെ
പ്രമുഖ തായമ്പക വിദഗ്ധര് പങ്കെടുക്കുന്ന പഞ്ചവാദ്യത്തിന്റേയും
നെറ്റിപ്പട്ടം കെട്ടിയ ഗജവീരന്മാരുടേയും അകമ്പടിയോടെ നടക്കുന്ന
ഘോഷയാത്രയില് കേരളത്തിന്റെ സാംസ്കാരിക തനിമ വിളിച്ചറിയിക്കുന്ന
കലാരൂപങ്ങളും, നിശ്ചല ദൃശ്യങ്ങളും, ആയോധന കലാപ്രദര്ശനങ്ങളും
ഉണ്ടായിരിക്കും.
കൊടിയേറ്റം കഴിയുന്നതോടെ സജീവമാകുന്ന
രംഗവേദികളില് മൂന്നുദിവസം നീണ്ടുനില്ക്കുന്ന വൈജ്ഞാനിക
സാഹിത്യസദസ്സുകളും, യുവമോഹിനി, രാജാറാണി എന്നീ പ്രദര്ശന മത്സരങ്ങളും,
യൂത്ത് ഫോറത്തിന്റെ ടാലന്റ് ഷോ, പാശ്ചാത്യ-പൂര്വ്വ സാംസ്കാരിക സമന്വയം,
നൃത്തോത്സവം, വനിതാ സെമിനാര്, ബിസിനസ് സെമിനാര്, നൂറ്റിയൊന്നു
ബാലതാരങ്ങളുടെ സിംഫണി, യുവജനോത്സവം, ചാക്യാര്കൂത്ത്, കഥകളി തുടങ്ങിയ
പരിപാടികള് നടക്കും.
അമേരിക്കന് രാഷ്ട്രീയത്തിലെ പ്രമുഖര്
പങ്കെടുക്കുന്ന സമാപന സമ്മേളനത്തിലും അത്താഴ വിരുന്നിലും 2017-ലെ ഏറ്റവും
മികച്ച സ്റ്റാര്ഷോ പ്രത്യേക ആകര്ഷണമായിരിക്കും. സമ്മേളനത്തിന്റെ
വിജയത്തിനായി കണ്വന്ഷന് ചെയര്മാന് രാജേഷ് നായര്, കണ്വീനര് ബിനു
പണിക്കര്, ഡോ. സതി നായര്, പ്രസന്ന മോഹന്, ശ്രീതാ പ്രദീപ്, സുബാഷ്
രാമചന്ദ്രന് എന്നിവരുടെ നേതൃത്വത്തില് വിപുലമായ കമ്മിറ്റി
പ്രവര്ത്തിച്ചുവരുന്നു.
സംഗമസന്ദേശം വിളംബരം ചെയ്യുന്നതിനും
വിവിധ ഹൈന്ദവ കൂട്ടായ്മകളെ പങ്കെടുപ്പിക്കുന്നതിനും കേരളത്തിലും
അമേരിക്കയിലുമായി രൂപംകൊടുത്തിട്ടുള്ള ഉപസമിതികളുടെ
പ്രവര്ത്തനങ്ങള് പ്രസിഡന്റ് സുരേന്ദ്രന് നായര്, ട്രസ്റ്റി ചെയര്മാന് ഷിബു
ദിവാകരന്, സെക്രട്ടറി രാജേഷ് കുട്ടി, ജോ. സെക്രട്ടറി കൃഷ്ണരാജ് മോഹനന്,
വൈസ് പ്രസിഡന്റ് വിനോദ് ബാഹുലേയന്, ജോ. ട്രഷറര് രഘുനാഥന് നായര്,
ട്രസ്റ്റി വൈസ് ചെയര് രതീഷ് നായര് എന്നിവര് ഏകോപിപ്പിക്കുന്നു.
കണ്വന്ഷനില് പങ്കെടുക്കുവാന് രജിസ്ട്രേഷന് ചെയര്മാന് സുനില്
പൈങ്കോള് (734 674 1927), കോര്ഡിനേറ്റര് അരവിന്ദ് പിള്ള (847 769 0519)
എന്നിവരുമായി ബന്ധപ്പെടുകയോ, www.namaha.org സന്ദര്ശിക്കുകയോ ചെയ്യുക.
സതീശന് നായര് അറിയിച്ചതാണിത്.