തിരുവനന്തപുരത്തെ രണ്ടാമത്തെ ഗവ. മെഡിക്കല് കോളേജിന് ഇന്ദിരാഗാന്ധിയുടെ
പേരിട്ടു. മുഖ്യമന്ത്രി ഉമ്മന്ചാണ്ടിയാണ് ഉദ്ഘാടനകര്മ്മം
നിര്വ്വഹിച്ചത്. ഉദ്ഘാടനസമ്മേളനത്തില്, ആഭ്യന്തരമന്ത്രി രമേശ്
ചെന്നിത്തലയാണ് കോളേജിന്റെ പേര് പ്രഖ്യാപിച്ചത്. ജനറല് ആശുപത്രിയേയും
തൈക്കാട് ആശുപത്രിയേയും സംയോജിപ്പിച്ചുകൊണ്ടുള്ള ഈ സ്ഥാപനം സംസ്ഥാനത്തെ
പത്താമത്തെ ഗവ. മെഡിക്കല് കോളേജാണ്.
ഏറ്റവും മികച്ച ആരോഗ്യസേവനം
തലസ്ഥാനത്ത് ലഭ്യമാക്കുക എന്ന ലക്ഷ്യത്തോടെയാണ് പുതിയ മെഡിക്കല് കോളേജ്
ആരംഭിക്കുന്നതെന്ന് ഉദ്ഘാടന പ്രസംഗത്തില് മുഖ്യമന്ത്രി പറഞ്ഞു. കഴിഞ്ഞ
അഞ്ചുവര്ഷം സര്ക്കാര് ഏറ്റവും കൂടുതല് പ്രാധാന്യം നല്കിയത്
ആരോഗ്യമേഖലയ്ക്കാണ്. മെച്ചപ്പെട്ട ചികിത്സാ സൗകര്യങ്ങള് സംസ്ഥാനത്തെ
എല്ലാ കുടുംബങ്ങള്ക്കും സര്ക്കാര് ആശുപത്രികളിലൂടെ ലഭ്യമാക്കാന്
സാധിച്ചതില് ചാരിതാര്ത്ഥ്യമുണ്ടെന്നും മുഖ്യമന്ത്രി
പറഞ്ഞു.
സംസ്ഥാനത്തെ മെഡിക്കല് വിദ്യാഭ്യാസമേഖലയില് 2,000 കോടി
രൂപയുടെ നിക്ഷേപം നടത്താന് സാധിച്ചതായി ആരോഗ്യമന്ത്രി വി.എസ്.
ശിവകുമാര് അധ്യക്ഷപ്രസംഗത്തില് അറിയിച്ചു. ഗവ. മെഡിക്കല്
കോളേജുകളുടെ എണ്ണം അഞ്ചില്നിന്നും പതിനാറാവുകയാണ്. അഞ്ചുവര്ഷത്തിനകം
അഞ്ച് ഗവ. മെഡിക്കല് കോളേജുകള് തുടങ്ങി. ആറെണ്ണത്തിന്റ നിര്മ്മാണം വിവിധ
ഘട്ടങ്ങളില് പുരോഗമിക്കുകയാണ്. പഴയ മെഡിക്കല് കോളേജുകളില്
മുമ്പൊരിക്കലും ഉണ്ടാകാത്തത്ര വികസനപ്രവര്ത്തനങ്ങള്
നടത്തിക്കൊണ്ടുതന്നെയാണ് പുതിയ മെഡിക്കല് കോളേജുകള് ആരംഭിച്ചത്.
സര്ക്കാര് ആശുപത്രികളുടെ വികസനവും മുന്കാലങ്ങളുമായി താരതമ്യം
ചെയ്യുമ്പോള് എത്രയോ മുന്നിലാണെന്ന് ഏവര്ക്കും ബോധ്യമാകും. മെഡിക്കല്
പ്രവേശനത്തിനായി അന്യരാജ്യങ്ങളേയും സംസ്ഥാനങ്ങളേയും ആശ്രയിച്ചിരുന്ന
കേരളത്തിലെ സാധാരണക്കാരായ നൂറുകണക്കിന് വിദ്യാര്ത്ഥികള്ക്ക് പുതിയ
മെഡിക്കല് കോളേജുകളുടെ ആവിര്ഭാവം വലിയ ആശ്വാസമായിരിക്കുകയാണ്.
സംസ്ഥാനത്തെ ഗവ. മെഡിക്കല് സീറ്റുകളുടെ എണ്ണം 950 ല്നിന്നും 1250 ആയി
ഉയര്ന്നു.
ഇന്ദിരാഗാന്ധി ഗവ. മെഡിക്കല് കോളേജില് ഈ വര്ഷം
നൂറുവിദ്യാര്ത്ഥികള്ക്ക് പ്രവേശനം നല്കാനാകും. ഇന്ത്യന് മെഡിക്കല്
കൗണ്സിലിന്റെ മാനദണ്ഡങ്ങളനുസരിച്ചുള്ള എല്ലാ സജ്ജീകരണങ്ങളും ഈ
മെഡിക്കല് കോളേജില് പൂര്ത്തിയായിട്ടുണ്ടെന്നും വി.എസ്. ശിവകുമാര്
അറിയിച്ചു. 35 കോടി രൂപ മുടക്കിയാണ് ആദ്യഘട്ടം
നിര്മ്മാണപ്രവര്ത്തനങ്ങള് പൂര്ത്തിയാക്കിയിട്ടുള്ളത്. 190.54 കോടി
രൂപയുടെ ഭരണാനുമതിയോടെ നാല് ഘട്ടങ്ങളിലായാണ് നിര്മ്മാണം. 1,38,000
ചതുരശ്ര അടി വിസ്തൃതിയുള്ള കെട്ടിട സമുച്ചയമാണ് മെഡിക്കല്
കോളേജിനുവേണ്ടി ഒരുങ്ങുന്നതെന്നും വി.എസ്. ശിവകുമാര്
അറിയിച്ചു.
സാധാരണക്കാരുടെ നന്മ ലക്ഷ്യമാക്കി പുതിയ മെഡിക്കല്
കോളേജ് ആരംഭിക്കുമ്പോള്, അതിനെ സ്വാഗതം ചെയ്യേണ്ടവരില് ചിലര് എതിര്പ്പ്
പ്രകടിപ്പിക്കുന്നത് ഖേദകരമാണെന്ന് ലക്ചര് ഹാള് ഉദ്ഘാടനം ചെയ്ത, രമേശ്
ചെന്നിത്തല പ്രസംഗത്തില് പറഞ്ഞു. ഡല്ഹി, മുംബൈ, ചെന്നൈ മുതലായ അനേകം
ഇന്ത്യന് നഗരങ്ങളില് ഒന്നിലധികം മെഡിക്കല് കോളേജുകള് ഉണ്ടെന്ന കാര്യം,
സങ്കുചിത ചിന്താഗതിയുടെ പശ്ചാത്തലത്തില് ഇവര് വിസ്മരിക്കുകയാണെന്ന്
ആഭ്യന്തരമന്ത്രി കുറ്റപ്പെടുത്തി.
മെഡിക്കല് കോളേജിലെ
ഡിസക്ഷന്ഹാളിന്റെ ഉദ്ഘാടനം കൃഷിവകുപ്പ് മന്ത്രി കെ.പി. മോഹനന്
നിര്വ്വഹിച്ചു. കെ. മുരളീധരന് എം.എല്.എ ലോഗോ പ്രകാശനം ചെയ്തു.
ആരോഗ്യവകുപ്പ് സെക്രട്ടറി ഡോ. കെ. ഇളങ്കോവന് വെബ്സൈറ്റിന്റെ ഉദ്ഘാടനം
നിര്വ്വഹിച്ചു. ട്രിഡ ചെയര്മാന് പി.കെ. വേണുഗോപാല്, മെഡിക്കല്
വിദ്യാഭ്യാസ ഡയറക്ടര് ഡോ. റംലാബീവി, ജോയിന്റ് ഡയറക്ടര് ഡോ. ശ്രീകുമാരി,
ആരോഗ്യവകുപ്പ് ഡയറക്ടര് ഡോ. ആര്. രമേഷ്, ഇന്ദിരാഗാന്ധി മെഡിക്കല്
കോളേജ് പ്രിന്സിപ്പാള് ഡോ. എല്. വിജയലക്ഷ്മി, സൂപ്രണ്ട് ഡോ. കെ.വി.
വിശ്വനാഥന്, തിരുവനന്തപുരം മെഡിക്കല് കോളേജ് പ്രിന്സിപ്പാള് ഡോ. തോമസ്
മാത്യു, പുതിയ മെഡിക്കല് കോളേജുകള്ക്കുവേണ്ടിയുള്ള സ്പെഷ്യല് ഓഫീസര്
ഡോ. പി.ജി.ആര്. പിള്ള, ജനറല് ആശുപത്രി സൂപ്രണ്ട് ഡോ. കൃഷ്ണകുമാര്,
ബി.എസ്.എന്.എല് ചീഫ് എഞ്ചിനീയര് ഡി. മോഹന് എന്നിവര് പ്രസംഗിച്ചു.