തിരുവനന്തപുരം നിയമസഭാ മണ്ഡലത്തിലെ 13 ഹയര്സെക്കന്ററി സ്കൂളുകളിലും 12
ഹൈസ്കൂളുകളിലും സ്മാര്ട്ട് ക്ലാസുകള് ആരംഭിച്ചു. മികവ് - സമഗ്ര വിദ്യാഭ്യാസ
പദ്ധതിയുടെ ഭാഗമായി, മന്ത്രി വി.എസ്. ശിവകുമാറിന്റെ എംഎല്എ ഫണ്ടില്നിന്നും
75 കോടി രൂപ വിനിയോഗിച്ചാണ് ഇവ സജ്ജമാക്കിയത്. സ്മാര്ട്ട് ക്ലാസ്സുകളുടെ
പ്രവര്ത്തനോദ്ഘാടനം ഫോര്ട്ട് ഗേള്സ് മിഷന് ഹൈസ്കൂളില്, കവയിത്രി
സുഗതകുമാരി നിര്വ്വഹിച്ചു. കുട്ടികള് കമ്പ്യൂട്ടറുകളുടെ
അടിമകളാകരുതെന്നും അവയെ തങ്ങളുടെ അടിമകളാക്കാനാണ്
ശ്രമിക്കേണ്ടതെന്നും സുഗതകുമാരി ഉദ്ഘാടനപ്രസംഗത്തില് പറഞ്ഞു.
കമ്പ്യൂട്ടറുകളുടെ ഗുണവശങ്ങളെമാത്രം ഉള്ക്കൊണ്ടുകൊണ്ട് അറിവും ആനന്ദവും
നേടാന് പരിശ്രമിക്കണമെന്നും സ്കൂള് അങ്കണത്തില് തിങ്ങിനിറഞ്ഞ
കുട്ടികളെ ഉദ്ബോധിപ്പിച്ചു.
സാധാരണക്കാരുടെ കുട്ടികള്
പഠിക്കുന്ന സര്ക്കാര്, എയിഡഡ് സ്കൂളുകളില് സ്മാര്ട്ട് ക്ലാസുകളും
കമ്പ്യൂട്ടര് ലാബുകളും സജ്ജീകരിക്കുന്നതിന് സാധിച്ചതില്
ചാരിതാര്ത്ഥ്യമുണ്ടെന്ന് അധ്യക്ഷപ്രസംഗത്തില് മന്ത്രി വി.എസ്.
ശിവകുമാര് പറഞ്ഞു. മണ്ഡലത്തിലെ സ്കൂളുകളുടെ
അടിസ്ഥാനസൗകര്യവികസനത്തിന് മുന്തിയ പരിഗണനയാണ് നല്കിയത്. ഇതിന്റെ
അടിസ്ഥാനത്തില് ഒട്ടേറെ സ്കൂളുകള്ക്ക് കെട്ടിടങ്ങള് നിര്മ്മിച്ച് നല്കി.
സ്കൂള് ബസുകളും ലഭ്യമാക്കി.
ചടങ്ങില് കൗണ്സിലര് കോമളവല്ലി,
ഹെഡ്മിസ്ട്രസ് എല്.ആര്. ഹെലന് വയലറ്റ്, മാനേജര് സൂസന് ഏബ്രഹാം, പിറ്റിഎ
പ്രസിഡന്റ് ബിജുലാല്, പൊതുപ്രവര്ത്തകരായ പി. പത്മകുമാര്, ശ്രീവരാഹം
വിജയന് എന്നിവര് പ്രസംഗിച്ചു. സ്കൂള് വിദ്യാര്ത്ഥിനി നന്ദന, സുഗതകുമാരി
ടീച്ചറുടെ കവിത ആലപിച്ചു. യശഃശരീരനായ മഹാകവി ഒ.എന്.വി. കുറുപ്പിനെ
അനുസ്മരിച്ചുകൊണ്ടായിരുന്നു ചടങ്ങിന്റെ തുടക്കം.