ന്യൂയോര്ക്: കോവിഡ് മഹാമാരി ലോകത്തെ കീഴ്പ്പെടുത്തിയതോടെ ഈ വര്ഷം 13.2 കോടി പേര്കൂടി കൊടുംപട്ടിണിയിലേക്ക് നീങ്ങുമെന്ന് ഐക്യരാഷ്ട്രസഭ മുന്നറിയിപ്പ്. ജനങ്ങള്ക്ക് നിലവാരമുള്ളതും പോഷകങ്ങള് അടങ്ങിയതുമായ ഭക്ഷണം ലഭ്യമാക്കാന് സര്ക്കാറുകള് നടപടി സ്വീകരിക്കണം.
കോവിഡ്മൂലം ആഫ്രിക്കയില് പകുതിയലധികം പേര്ക്ക് ജോലി നഷ്ടമായി. ലാറ്റിനമേരിക്ക, ഏഷ്യ എന്നിവിടങ്ങളിലും തൊഴില് നഷ്ടവും പട്ടിണിയും വര്ധിക്കുകയാണ്. സബ്സിഡിയോടെയുള്ള ഭക്ഷ്യവിതരണം, ഭക്ഷണ ഉല്പന്നങ്ങള്ക്ക് നികുതി ഒഴിവാക്കല്, ദരിദ്രര്ക്ക് നേരിട്ട് പണം ലഭ്യമാക്കല് എന്നീ നടപടികള് സ്വീകരിച്ചില്ലെങ്കില് ലോകത്തെ കാത്തിരിക്കുന്നത് വന് ദുരന്തമായിരിക്കുമെന്നും ഐക്യരാഷ്ട്രസഭ മുന്നറിയിപ്പ് നല്കുന്നു.