ഈയിടെയായിട്ടൊന്നും
ഓർമ്മയിൽ നില്ക്കുന്നില്ല
പേരുകൾ മറക്കുന്നു
നാളുകൾ മറക്കുന്നു
മുഖങ്ങൾ മറക്കുന്നു
താളുകൾ മറിയാതെ
ജീവിതമൊഴുകാത്തപോൽ...
ഇലകളിളകാതെ
ഇമകളനങ്ങാതെ നിമിഷങ്ങൾ നീങ്ങുന്നപോൽ.....
ഓർമ്മകൾ മങ്ങുന്നുവോ...
എങ്കിൽ..ഞാനില്ല...
എന്നിലെയസ്ഥിത്വമില്ല...
വിലപ്പെട്ടതെല്ലാം
ഊർന്നുവീഴുന്നപോൽ.
മനസ്സിലുണ്ടെല്ലാമൊരു
മായപോലെ
പ്രജ്ഞയിലെ-
ത്താത്തപോൽ...
നൂൽപൊട്ടിയ പട്ടംപോൽ
അലയുന്നു ചിന്തകൾ
മേച്ചിൽപ്പുറങ്ങളിൽ
ഇടം കിട്ടാതെ...!
വാക്കുകൾ മുറിയുന്നു
നോട്ടങ്ങൾ അകലുന്നു
തിരയുന്നു
പരതുന്നു, ചുറ്റിലും..!
മറവി..
മറവിയോരനുഗ്രഹമാ-
യിരുന്നെങ്കിൽ,
ആശിച്ചിരുന്നു...
പക്ഷേ, അവനവനെത്തന്നെ
മറന്നു പോയീടുന്ന മറവിയോ... !
ഏറെയായില്ലനാളീ വിധം
കുണ്ഠിതം..
ഏതുറക്കത്തിലും
ഓർമ്മയിൽ തപ്പാതെ
ഉരുവിട്ടിരുന്നവയെല്ലാം
മറവിയുടെ മാറാല
പൊതിയുന്നു...!
മറവിയൊരനുഗ്രഹമല്ല..
മിഴിവോടെ മിന്നണം
ഓർമ്മകൾ...!