ബജെപി സംസ്ഥാന പ്രസിഡന്റ് കെ.സുരേന്ദ്രനെ വെട്ടിലാക്കി വീണ്ടും ശബ്ദരേഖ. പ്രസീദ അഴീക്കോട് തന്നെയാണ് വീണ്ടും ശബ്ദരേഖ പുറത്ത് വിട്ടത്. പുതിയ ശബ്ദരേഖ ബിജെപിക്കുള്ളില്‍ തന്നെയുള്ള വിഭാഗിതയ കൂടുതല്‍ രൂക്ഷമാകാന്‍ കാരണമാകുന്നതു കൂടിയാണ്. 

ജാനുവിന് സുരേന്ദ്രന്‍ പത്ത് ലക്ഷം രൂപം കൊടുത്തെന്ന് നേരത്തെ ജനാധിപത്യ രാഷട്രീയ പാര്‍ട്ടി ട്രഷറര്‍ പ്രസിദ അഴീക്കോട് ആരോപണമുന്നയിച്ചിരുന്നു. സുരേന്ദ്രന്‍ പത്ത് ലക്ഷം നല്‍കാമെന്ന് പറയുന്ന ശബ്ദരേഖയും പുറത്തു വന്നിരുന്നു. ഇതിന്റെ തുടര്‍ച്ചയായുള്ള ഫോണ്‍ കോളുകളുടെ റെക്കോര്‍ഡിംഗുകളാണ് ഇപ്പോള്‍ പുറത്ത് വരുന്നത്. 

ജാനുവിന് പണം നല്‍കാന്‍ ഹോട്ടല്‍ മുറിയിലെത്തുന്നതിന് മുമ്പ് സുരേന്ദ്രനും പ്രസീദയും തമ്മിലുള്ള സംസാരത്തിന്റെ ശബ്ദരേഖയാണ് ഇത്. 'ഇതൊന്നും കൃഷ്ണദാസ് അറിയരുത്, ഞാനത് എല്ലാം റെഡിയാക്കി എന്റെ ബാഗില്‍ വെച്ചിട്ട് ഇന്നലെമുതല്‍ അങ്ങോട്ടും ഇങ്ങോട്ടും ഇത് കൊണ്ടു നടക്കുകയാണ്' - എന്നാണ് ശബ്ദരേഖയിലുള്ളത്.

ബജെപി നേതാവ് പി.കെ കൃഷ്ണദാസ് ജാനുവിനെ എന്‍ഡിഎയില്‍ തിരിച്ചെത്തിക്കാന്‍ ശ്രമങ്ങള്‍ നടത്തിയിരുന്നു. എന്നാല്‍ അന്ന് അവര്‍ അത് നിഷേധിക്കുകയാണുണ്ടായത്. ആ സമയം മുസ്ലിംലീഗില്‍ നിന്നും ഓഫറുണ്ടായിരുന്നത് കൊണ്ടാണ് ജാനു കൃഷ്ണദാസിന്റെ ക്ഷണം നിരസിച്ചതെന്നും പ്രസീദ ഒരു മലയാളം ചാനലിനോട് വെളിപ്പെടുത്തി. 

പാര്‍ട്ടിയിലെ മറ്റൊരു നേതാവായ കൃഷ്ണദാസ് ഇതൊന്നുമറിയരുതെന്ന് സുരേന്ദ്രന്‍ പറഞ്ഞത് പാര്‍ട്ടിയിലും വിവാദമായേക്കും മാത്രമല്ല മുസ്ലീലീഗ് ജാനുവിനെ ക്ഷണിച്ചിരുന്നെന്ന വെളിപ്പെടുത്തലും രാഷ്ട്രീയകേരളം സൂക്ഷമതയോടെയാണ് വീക്ഷിക്കുന്നത്. വരും ദിവസങ്ങളില്‍ ലീഗ് നല്‍കിയ ഓഫര്‍ സംബന്ധിച്ചുള്ള വിവരങ്ങളും പുറത്തു വന്നേക്കും.പുതുതായി പുറത്തു വന്ന ശബ്ദരേഖയുടെ കാര്യത്തില്‍ കെ.സുരേന്ദ്രനോ പി.കെ. കൃഷ്ണദാസോ ഇതുവരെ പ്രതികരിച്ചിട്ടില്ല.