പൌർണ്ണമി നാളിൽ ഹിന്ദിക്കവികൾ
സാൾമരത്തലപ്പുകൾക്കു മീതെ കാണും കനലിൽ കരിഞ്ഞു പോകാതെ ചുട്ടെടുത്ത ചപ്പാത്തി
പൌർണ്ണമി നാളിൽ മലയാളക്കവികൾ
തെങ്ങോലകൾക്കു മീതെ കാണും
പശുവിൻനെയ്യിൽ മൊരിച്ചെടുത്ത ദോശ
ചന്ദ്രൻ ഇതൊന്നുമറിയാതെ
പൂർണ്ണചന്ദ്രനായി ആകാശത്തിൽ
തിളങ്ങും കിരീടമുപേക്ഷിച്ച
ഒരു സുൽത്താൻസൂഫിയായി!
നീൽ ആംസ്ട്രോങ്ങിനെക്കുറിച്ച്
ചന്ദ്രനറിയില്ല
ചാന്ദ്രയാൻ ദൌത്യത്തിന്റെ
ജയപരാജയത്തെക്കുറിച്ച്
ചന്ദ്രനറിയില്ല
ഭ്രമിയിലെ ഒരു പിടി ധനികർ
തന്നെ ഒരു വിമാനത്താവളമൊ
യുദ്ധത്താവളമൊ ആക്കി മാറ്റാൻ
പോകുന്ന കാര്യവും
ചന്ദ്രനറിയില്ല
ചന്ദ്രോപരിതലത്തിലെ പാറകളുടെ
നിശ്ശബ്ദത പരാവർത്തനം ചെയ്യുവാൻ
ചന്ദ്രന് ഒരു ഉൾവിളിയുമില്ല
ഒരു ചിരിത്തോണിയിൽ
ചന്ദ്രൻ കാത്തിരിക്കയാണ്
സൂര്യന്റെ അനുഗ്രഹാശിസ്സുകൾക്കായി
ഭൂമിയിലെ അന്ധകാരത്തിനായി
മുഖക്കണ്ണാടി കാട്ടുന്ന കടലിനായി
ഏകാകികളുടെ ഗദ്ഗദങ്ങൾക്കായി
കാമശരമേറ്റ് പിടയുന്ന ദേഹികൾക്കായി
പരസ്പരബന്ധമില്ലാതെ പിച്ചും പേയും
പറയുന്ന ഉന്മാദികൾക്കായി
പങ്കായമില്ലാത്ത
ഒരു ചിരിത്തോണിയിൽ
ചന്ദ്രൻ കാത്തിരിക്കയാണ്
മരിച്ചവർ ഭൂമിയിൽ വിസർജ്ജിക്കുന്ന
പ്രാണന്റെ ഹവിസ്സിനായി
സ്ക്രീനിൽ ജീവിക്കുന്ന കുഞ്ഞുങ്ങൾക്ക്
അമ്പിളിമാമനൊന്നുമല്ല;
വെറുമൊരു സ്മൈലി ഇമോജി!